1 ნოემბერს ვარძიის ღვთისმშობლის მიძინების ტაძარში ცეცხლი გაჩნდა რის გამოც, უნიკალური ფრესკები ჭვარტლით დაიფარა. 2 ნოემბერს ტაძარში რესტავრატორების ჯგუფი გაემგზარა, რათა შეეფასებინათ დაზიანების სიმძიმე და შეემუშავებინათ გეგმა, რა მეთოდით მოხდებოდა ფრესკების გაწმენდა. ჯავახეთის მკაცრი და ცივი კლიმატის გამო რესტავრატორებმა ვერ შეძლეს, რომ სარემონტო სამუშაოები ზამთარში განეხორციელებინათ ამჟამად დროებით შეჩერებულია ფრესკების აღდგენის პროცესი.
„თბილისი თაიმსი“ დაუკავშირდა სამხატვრო აკადემიის რესტავრაციის მიმართულების ხელმძღვანელ ნანა კუპრაშვილს, რომელიც აცხადებს, რომ გაწმენდის შემდეგ ვიზუალურად თვალისთვის შეუმჩნეველი იქნება ხანძრის შედეგად დატოვებული კვალი, ის ინტერვიუში, ასევე, საუბრობს სარემონტო სამუშაოების გაგრძელების თარიღზეც.
“ფრესკების ნაწილში ჭვარტლის გარკვეული რაოდენობა უკვე ჩამჯდარია და მას აღარაფერი ეშველება. მაქსიმალურად ვცდილობთ, რომ ვიზუალურად პირვანდელი სახე დავუბრუნოთ, თანაც მიკრონაწილაკები, რომელიც კირშია გამჯდარი თვალითაც არ ჩანს. წინასწარ ძალიან რთულია თქმა რა დონეზე იქნება შესაძლებელი გაწმენდა, მაგრამ მცირედი ნაწილი აუცილებლად დარჩება. ვისაც ფრესკები აქვს ნანახი, მათთვის ვიზუალურად ისევ ისეთი იქნება, მაგრამ არის მცირედი ნაწილები, რომელთა გაწმენდა შეიძლება ვერ მოხდეს. აქვე აღვნიშნავ, რომ მხატვრობა ისედაც შავი იყო, სხვადასხვა დროს მომხდარი ხანძრის შედეგად.
ვარძიაში ამ ეტაპზე ტემპერატურა მინუს გრადუსზეა, სავარაუდოდ, როგორც კი პლუსებში გადავა, მაშინვე განახლდება სამუშაოები. ვვარაუდობთ, რომ ეს მოხდება თებერვლის მეორე ნახევრიდან–თებერვლის ბოლომდე”
ნანა კუპრაშვილი ამბობს, რომ რომ ტურისტებისა და ადგილობრივი დამთვალიერებლისათვის ვარძიის ღვთისმშობილის მიძინების ტაძარი დაკეტილია.
“რამდენადაც ჩემთვის ცნობილია დაკეტვიდან 40 დღის გასვლის შემდეგ გაიხსნა ტაძარი, ჩატარდა ლოცვა და ასევე შობისდღესასწაულზე, მაგრამ მისული იყო მლოცველთა ძალიან მცირე რაოდენობა. მთავარია, რომ არ მოხდეს მასიური მასშტაბის მიღება და მუდმივად ღია არ იყოს ადგილი. ამ ეტაპზე მნიშვნელოვანია, არ მოხდეს ტემპერატურისა და ტენიანობს მკვეთრი ცვლილება, რათა ზედაპირზე არსებული სიშავე არ ჩაჯდეს და მოვასწროთ გაწმენდა. მოსაზრება, რომ ფრესკები კირითაა ნაშენები და ამის გამო შეიწოვს ჭვარტლს მცდარია. არაფერი მსაგვსი არ ხდება.
არასდროს იმას არ ვიტყვი, რომ ტაძარში წირვა–ლოცვა არ უნდა ტარდებოდეს. ლოცვა უნდა ჩატარდეს ახლაც და სამომავლოდაც, როდესაც მოხდება ფრესკების გაწმენდა. უბრალოდ ეკლესიასთან შეთანხმებით მიღებული უნდა იქნას გარკვეული რეგულაციები. როდესაც ტაძარში მასიურად შედის ტურისტული ჯგუფები არ უნდა იქნას დაშვებული პარაფინის სანთლის დანთება. ჩემი რეკომენდაციით, ექსკურსიებითა და ტურისტულად მისული მნახველისთვის სანთლის დასანთებად ცალკე ადგილი უნდაგამოიყოს. წირვა–ლოცვას, რომელსაც სამღვდელოება აღავლენს ფრესკებისათის განსაკუთრებული ზიანი არ მოაქვს. წირვის დროს ხდება უფრო მცირე რაოდენობის სანთელი დაინთება და ეს სანთელი უნდა იყოს თაფლისგან დამზადებული. ამ ეტაპზე თუ არ იქნება დიდი რაოდენობით სანთელი დანთებული, მაშინ დასაშვებია ტაძარში ლოცვის იშვიათად ჩატარება.”
ნანუკა მაღლაკელიძე
