2016 წლის მიწურულს, მადრიდის მერმა მანუელა კარმენამ განაცხადა,რომ დედაქალაქის ცენტრში 2017 წლიდან ავტომობილების მოძრაობა აიკრძალება. როგორც ცნობილია, ქვეყანაში 2019 წლამდე შევა კანონი,რომლის მიხედვითაც გრან ვიას გამზირზე მხოლოდ ველოსიპედების, ავტობუსებისა და ტაქსების მოძრაობა იქნება ნებადართული. ეს გადაწყვეტილება იმ დიდი ინიციატივის ნაწილია,რომლის მიხედვითაც, ესპანეთში 2025 წლისთვის ყველა დიზელზე მომუშავე ავტომობილის მოძრაობა იკრძალება. თუმცა მადრიდი არ არის ერთადერთი ქალაქი,რომელიც მსგავსი ინიციატივებით გამოდის. მსოფლიოს სხვადასხვა ქვეყანაში უკვე დაიწყეს ფიქრი იმ გზებზე,რომელთა მეშვეობითაც გაიზრდება ფეხით მოსიარულეთათვის სივრცე და შემცირდება ჰაერში CO2-ის რაოდენობა. გაეცანით დანარჩენ ქალაქებს და მათ რეგულაციებს ავტომობილების აკრძალვასთან დაკავშირებით.
ოსლო
ოსლოში უკვე გამოქვეყნდა რუკა, რომელშიც შემოხაზულია ქალაქის ის ტერიტორია, სადაც ავტომობილებით მოძრაობა აკრძალული იქნება. ეს ინიციატივა 2019 წლისთვის შევა ძალაში.
მადრიდი
2020 წლისთვის მადრიდის ყველაზე გადატვირთულ 24 ქუჩაზე მანქანები აღარ იმოძრავებენ, მათი მიზანია, მანქანების მოძრაობის შემცირება 29%-დან 23%-მდე. მძღოლები, რომლებიც უგულვებელყოფენ ამ რეგულაციას დაჯარიმდებიან. ავტომობილები,რომლებიც მეტად აბინძურებენ გარემოს, უფრო მეტს გადაიხდიან.
ჩენგდუ
ჩინეთის ქალაქ ჩენგდუში ჩიკაგოელმა არქიტეგორებმა ადრიან სმიტმა და გორდონ გილმა სპეციალური საცხოვრებელი რაიონები დააპროექტეს. ამ რაიონებში მოძრაობა მხოლოდ ფეხით იქნება შესაძლებელი. პროექტი 2020 წლისთვის დასრულდება.
ჰამბურგი
პროექტი „მწვანე ქსელი“,რომელიც ჰამბურგში ხორციელდება გულისხმობს იმ სივრცეების შექმნას, სადაც ადამიანები ფეხით შეძლებენ მოძრაობას. პროექტის მიხედვით, 2035 წლისთვის ჰამბურგის 40%-ში პარკების, სპორტული ცენტრებისა და სასაფლაოების ჩათვლით, ფეხით მოძრაობა სავალდებულო იქნება.
კოპენჰაგენი
კოპენჰაგენი პიონერია, ამ ქალაქში ჯერ კიდევ 1960 წელს დაიწყო შეზღუდვები ავტომობილებისთვის. დღესდღეობით, კოპენჰაგენის მოსახლეობის ნახევარზე მეტი ველოსიპედით გადაადგილდება. 2018 წლისთვის დაგეგმილია დედაქალაქის სხვა ნაწილებში ახალი ველო ბილიკების გახსნა, რომელიც 2025 წლისთვის ჰაერში კარბონის რაოდენობას მინიმალურ შემცველობამდე მიიყვანს.
პარიზი
პარიზის ზოგიერთ რეგიონში 2014 წელს აიკრძალა ავტომანქანების მოძრაობა. ამ ინიციატივამ ქალაქის დაბინძურების დონე 30%-ით შეამცირა. 2016 წელს შევიდა ძალაში კიდევ ერთი რეგულაცია, რომლის თანახმადაც 1997 წლამდე გამოშვებული მანქანების მოძრაობა აიკრძალა. საინტერესოა ისიც, რომ 2020 წლისთვის დედაქალაქის სივრცეში მხოლოდ ელექტრონული მანქანები იქნება დაშვებული.
ათენი
ათენი შეუერთდა ამ ქალაქების რიცხვს 2016 წლის დეკემბერში. მერმა დაანონსა,რომ 2025 წლისთვის სრულად იქნება აკრძალული ქალაქში მანქანების მოძრაობა. მიზეზად ათენში ჰაერის დაბინძურების შემცირება დასახელდა.
ლონდონი
პარიზის მსგავსად, ლონდონის მერმაც განაცხადა, რომ 2020 წლისთვის დედაქალაქში დიზელზე მომუშავე მანქანები სრულად აიკრძალება. ავტომანქანებთან ერთად იკრძალება დიზელზე მომუშავე ველოსიპედებიც.
ბრიუსელი
ბრიუსელი მსოფლიოში ყველაზე დიდ სივრცეს გვთავაზობს, სადაც ავტომანქანების მოძრაობა აკრძალულია და ფეხით გადაადგილებაა შესაძლებელი. 2002 წლიდან ამ ქალაქში დაიწყო კამპანია, რომელიც საზოგადოებას კერძოდან, საზოგადო ტრანპორტით მგზავრობისკენ მიუთითებდა. 2016 წელს კი მიიღეს რეგულაცია, რომლის თანახმადაც, 1998 წელს ქვემოთ გამოშვებული მანქანების მოძრაობა ქალაქის ცენტრში აიკრძალა.
მეხიკო
მეხიკოში არსებული რეგულაციით,დაახლოებით, 2 მილიონამდე მანქანას აეკრძალება ქალაქის ცენტრში მოძრაობა. ადგილობრივი ხელისუფლების წარმომადგენლების თქმით, 2016 წელს მიღებული ეს გადაწყვეტილება კიდევ გამკაცრდება, მიზეზი ქალაქში სმოგის დიდ რაოდენობასთან ბრძოლაა.
ვანკუვერი
ზემოთხსენებული ქალაქებისგან განსხვავებით,რომლებიც კრძალავენ ავტომობილების მოძრაობას, ვანკუვერში გეგმავენ რომ უფრო მეტი საფეხმავლო და ველო-ბილიკი გახსნან. ქალაქში არსებობს ერთი დღე, ივნისში, როდესაც ავტომობილებს სახლში ტოვებენ და მოსახლეობის დიდი ნაწილი ფეხით მოძრაობს. ასეთი დღე სხვა ქალაქებშიცაა, თუმცა ვანკუვერის მოსახლეობა ამ „აქციაში“ მაქსიმალური რაოდენობითაა ჩართული.
ნიუ-იორკი
ნიუ-იორკი ახლო მომავალში არ ცდილობს სერიოზული რეგულაციების მიღებას ავტომობილების მოძრაობის აკრძალვასთან დაკავშირებით. თუმცა ზრდის საფეხმავლო და ველო-ბილიკების რაოდენობას და საზოგადოებრივი ტრანსპორტის პოპულარიზაციას.
ნათია კეკენაძე
