„ერთ-ერთმა ყველაზე ავტორიტეტულმა ორგანიზაციამ, „მსოფლიო ჯანდაცვის ორგანიზაციამ“ საქართველო დაასახელა ლიდერ ქვეყნად ჰაერის დაბინძურებით გამოწვეული სიკვდილიანობის მხრივ. ეს მონაცემები შევისწავლეთ, თუ როგორ აღმოჩნდა საქართველო ლიდერ პოზიციაზე ჩინეთთან და ინდოეთთან შედარებითაც, რომელთა ჰაერის დაბინძურებაც საყოველთაოდ ცნობილია“. ამის შესახებ დაავადებათა კონტროლის ცენტრის არაგადამდებ დაავადებათა დეპარტამენტის მრჩეველმა, ნია გიუაშვილმა „საზოგადოებრივ მაუწყებელზე“, გადაცემა „რეალური სივრცის“ ეთერში ისაუბრა.
„ჩვენ ვთხოვეთ ჯანდაცვის მსოფლიო ორგანიზაციას, რომ გაეზიარებინათ ის მეთოდოლოგია, რომლითაც ამის გაანგარიშება მოხდა. 2016 წლის ივლისში მათი სპეციალური მისია ჩამოვიდა საქართველოში ადგილზე მდომარეობის შესასწავლად, ჩვენ მათ უახლესი მონაცემები მივაწოდეთ. ჰაერის დაბინძურებაზე როცა ვსაუბრობთ, მხედველობაში მიიღება არა მხოლოდ ატმოსფერული ჰაერი, არამედ შენობის შიგნით არსებული დაბინძურებაც, გამოწვეული ამა თუ იმ ტიპის დამაბინძურებლებით, მათ შორის მყარი საწვავის გამოყენებით.
ძირითადად მტვრით დაბინძურება 5 დაავადებას იწვევს, ეს არის გულსისხლძარღვთა დაავადებები, მათ შორის გულის იშემიური დაავადება, ინსულტი, ფილტვის ქრონიკული დაავადებები და ქვედა სასუნთქი გზების ინფექციური დაავადებები. მთლიანი ავადობის 17 % და სიკვდილიანობის 19 % არის გამოწვეული გარემოსთან ასოცირებული მავნე ზემოქმედებით. ბავშვებში ჰაერის დაბინძურება ავადობის 30 %-ს იწვევს“ , – განაცხადა ნია გიუაშვილმა.
მანანა ღოღობერიძე
