„გადაწყვეტილება არ ისაუბრო ამაზე და იხელმძღვანელო ფრაზით, თუ ამბავი არ იყო ტელეეკრანზე, ის არ მომხდარა, არა მხოლოდ შეცდომა, არამედ სიბრიყვეა. ამის შესახებ სოციალური ქსელით მაინც ყველა გაიგებს და კლასიკური მედიის მიმართ უნდობლობა გაიზრდება“. ამის შესახებ ჟურნალისტმა ვლადიმერ პოზნერმა ტელეკომპანია „იმედზე“, გადაცემა „იმედის დროს“ ეთერში ისაუბრა.
„ეს არ არის კლასიკური მედია, თუმცა, უდავოდ არის კომუნიკაციის საშუალება და ახალგაზრდობა მას დიდ დროს უთმობს. სოციალური მედიის როლი კიდევ გაიზრდება. არ ვიცი როგორ მოიქცევა ხელისუფლება. შეზღუდვა რთული იქნება, რადგან ახალგაზრდების დიდი პროცენტი ტელევიზორს აღარ უყურებს, გაზეთებს არ კითხულობს, ინფორმაციას კი სოციალურ ქსელებში ეძებს. ჩვენ არ ვცხოვრობთ საბჭოთა კავშირში. არც სტალინის, და არც მის შემდგომ ეპოქაში. გაიზარდა მთელი თაობა, რომელსაც არ ეშინია.
ხელისუფლებამ უკვე გვაჩვენა რისი უნარი აქვს. არ აქვს მნიშვნელობა ვუჭერ თუ არა მხარს დემონსტრაციებს. ვეთანხმები ნავალნის თუ არა, მოხდა საინფორმაციო შეტევა და ეს აღწერდა ქვეყანაში არსებულ ვითარებას. აჩვენე და როგორც გინდა ისეთი შეფასება მიეცი, თუნდაც პროვოკაცია უწოდე, მაგრამ აჩვენე. თავს ნუ იტყუებ, თითქოს არაფერი მომხდარა. აქ ჟურნალისტიკაზეც არ არის საუბარი, ეს პროპაგანდის ცუდი მაგალითი იყო.
მე არ მომწონს ნავალნი, არ მესიმპატიურება, მაგრამ ეს მნიშვნელოვანი არ არის. ის ერთადერთი რეალური ოპოზიციონერია, რომელიც პუტინის წინააღმდეგ გამოდის. თუ მიეცა საშუალება, რომ საპრეზიდენტო არჩევნებზე კენჭი იყაროს, მაინც არ აქვს შანსი, პუტინს ის ვერ მოერევა. პუტინს მოსახლეობის 80–85 %–ის მხარდაჭერა აქვს, ეს რეალურია. პუტინისთვის ნავალნი საფრთხეს არ წარმოადგენს. ხელისუფლება რაც უფრო მეტ ნაბიჯს გადადგამს ნავალნის წინააღმდეგ, მით უფრო გაამყარებს მის პოზიციებს. ნავალნის დაკავებაც მისი, როგორც გმირის იმიჯს ამყარებს.
დღეს ადამიანები აპროტესტებენ კორუფციას, რომელმაც რუსეთში ყველა სფერო მოიცვა. რეალურად მოსკოვში ძალიან ცოტა ადამიანი გამოვიდა. აქციის ორგაიზატორები 15 ათას მონაწილეს ასახელებენ, პოლიცია 8 ათასს, დავუშვათ,რომ იყო 11 ათასი, ქვეყნის მასშტაბით 150 ათასი უკმაყოფილოა, ეს ძალიან ცოტაა რუსეთისთვის. რუსეთში არ არის პროტესტების ტრადიცია, თუმცა ამ თაობამ შესაძლოა ვითარება შეცვალოს. რუსეთში, სადაც დემოკრატიის ტრადიციები არ არსებობს, აღმასრულებელ ხელისუფლებას წინ არაფერი უდგას იმისთვის, რომ საკანონმდებლო და სასამართლო ხელისუფლება აკონტროლოს. ამიტომ ეს სცენარი არ იქნება რთული, მთავარია ამის ნება გაჩნდეს“ , – განაცხადა ვლადიმერ პოზნერმა.
მანანა ღოღობერიძე
