დასუფთავების ინსპექტორები პირველი ორი კვირა მოქალაქეებს გააფრთხილებენ – თბილსერვის ჯგუფი

გარემოს დანაგვიანების პრობლემა, ჩვენს ქვეყანაში, ერთერთი აქტუალური საკითხია. ამ თემაზე მსჯელობა ხშირად ყოფილა, მაგრამ მოქალაქეების თვითშეგნება იმ დონემდე გაზრდილი არაა, რომ ამგვარი ქმედებისგან თავი შეიკავონ. სწორედ ამიტომ, რამდენიმე დღეა, რაც თბილისის მერიის ინიციატივით ქალაქის ქუჩებში „თბილსერვის ჯგუფის“ დასუფთავების ინსპექტორები გამოჩნდნენ, ისინი თბილისის ქუჩებს გააკონტროლებენ და აღნიშნულ ქმედებაში შენიშნულ მოქალაქეებს გარკვეულ ჯარიმას გამოუწერენ. იმის გასარკვევად, თუ რა სანქციები გატარდება გარემოს დანაგვიანების გამო მოქალაქეების მიმართ, „თბილისი თაიმსი“ „თბილსერვის ჯგუფს“ დაუკავშირდა.

ქალაქის დანაგვიანების გამო მოქალაქეები უკვე დაჯარიმდნენ? რა თანხაზეა საუბარი? ჯარიმა საიდან იწყება და გადასახდელი თანხა როგორ განისაზღვრება?

 – შპს „თბილსერვის ჯგუფის“ ინსპექტორები დედაქალაქში 3 აპრილს გამოჩდნენ. პირველი ორი კვირის განმავლობაში მათ საქმიანობას ინფორმაციული სახე ექნება – ისინი  მოქალაქეებს გააფრთხილებენ, სანქციებთან დაკავშირებით ინფორმაციას მიაწვდიან  და მათ მიერ დაყრილი ნარჩენის ურნაში ჩაყრისკენ მიუთითებენ. აღნიშნულიდან გამომდინარე, მოქალაქეები ჯერ არ დაჯარიმებულან.

2 კგ-მდე მუნიციპალური ნარჩენით გარემოს დანაგვიანება ისჯება 80 ლარით, იგივე ქმედება ჩადენილი შენობა-ნაგებობიდან 100 ლარით;

2 კგ-ზე მეტი მუნიციპალური ნარჩენით გარემოს დანაგვიანება ისჯება 150 ლარით, იგივე ქმედება ჩადენილი შენობა-ნაგებობიდან 500 ლარით;

ძაღლის ან სხვა შინაური ცხოველის მცირე ოდენობის ფეკალური მასით ტერიტორიის დაბინძურება – 50 ლარით.

თბილისის  მასშტაბით ქალაქში სისუფთავის დაცვას რამდენი ადამიანი გააკონტროლებს? მათი გადამზადება როგორ მოხდა, რა კრიტერიუმებით შეირჩნენ?

– დედაქალაქის ხალხმრავალი ადგილების კონტროლს 20 ინსპექტორი 10 ჯგუფად განახორციელებს. ინსპექტორები სანამ თბილისის ქუჩებში გამოჩნდებოდნენ, მათი დატრენინგება და გადამზადება მოხდა. რამდენიმე კვირის განმავლობაში ისინი მომავალი საქმიანობის შესახებ როგორც თეორიულ, ისე პრაქტიკულ ცოდნას ეუფლებოდნენ. „თბილსერვის ჯგუფის“ არსებული თანამშრომლები მომავალ ინსპექტორებთან ერთად პერიოდულად გადიოდნენ თბილისის ქუჩებში და მიღებული ცოდნის პრაქტიკულად განხორციელებაში ეხმარებოდნენ.

დაჯარიმებული მოქალაქეები თანხას სად გადაიხდიან? ჯარიმის გადაუხდელობის შემთხვევაში მათ მიმართ რა რეგულაციები გატარდება?

– ჯარიმის გადახდა ნებისმიერ ბანკშია შესაძლებელი, ხოლო თუ ჯარიმის გადახდა დადგენილ ვადაში არ მოხდება, ინფორმაცია  თბილისის სააღსრულებო ბიუროს გადაეგზავნება (ტარდება ანალოგიური ღონისძიება, როგორც ადმინისტრაციული ჯარიმის გადაუხდელობის შემთხვევაში).

ნინო ზარიძე