დედაქალაქის ქუჩებში ტრანსპორტის გადატვირთული მოძრაობა კვლავ აქტუალურ საკითხად რჩება. მოცემული პრობლემის აღმოსაფხვრელად ქალაქის მერიაში მუშაობა კარგა ხანია დაწყებულია.
გავრცელებული ინფორმაციით, თბილისში ახალი სატრანსპორტო ხაზის გამოყოფა იგეგმება, რაც მუნიციპალური ტრანსპორტის მომხმარებელთათვის საკმაოდ ხელსაყრელი იქნება. ამასთან დაკავშირებით, „თბილისი თაიმსი“ ქალაქ თბილისის მუნიციპალიტეტის მერიის ტრანსპორტის საქალაქო სამსახურს დაუკავშირდა:
„თბილისის მერია აზიის განვითარების ფონდის მიერ დაფინანსებულ კომპანია „მოტ მაკდონალდსთან“ თანამშრომლობს. ეს კომპანია სამარშუტო სქემებს იკვლევს. კომპანიის ერთერთი მიმართულება თბილისში საზოგადოებრივი ტრანსპორტისთვის საგზაო კორიდორის შემოთავაზება იყო. მათ დიდი დიღომი-მარჯანიშვილის სატრანსპორტო მაგისტრალის დაგეგმარების პროგრამა წარმოადგინეს, სრულ ვერსიას კი აპრილის ბოლოს ჩაგვაბარებენ, შემდგომ კი პროექტს საბოლოოდ განვიხილავთ. ეს იქნება ავტობუსებისთვის განსაზღვრული სამარშუტო ხაზი, სამომავლოდ, შესაძლოა, ამ ხაზზე ტრამვაიმაც გაიროს, არაფერს გამოვრიცხავთ. უნდა აღინიშნოს, რომ ეს არ იქნება „ჩქაროსნული ავტობუსი“, მაგ: როგორც „ჩქაროსნული მატარებელი“, უბრალოდ, ტრანსპორტი სწრაფად და დაუბრკოლებლად იმოძრავებს. პროექტის განხორცილება გარკვეულ დროსა და სამუშაოებს საჭიროებს, აუცილებელია სატრანსპორტო ხაზის შესაბამისი ინფრასტრუქტურის მოწყობა, თუმცაღა, ყოველივე ნამდვილად განხორციელდება.“
ნინო ზარიძე
