“უფასო მედიკამენტების შეძენა შეეძლებათ მოქალაქეებს, რომლებიც აღრიცხულნი არიან სოციალური მომსახურების სააგენტოს უმწეო ოჯახების საინფორმაციო ბაზაში და აქვთ 100 ათას სარეიტინგო ქულაზე ნაკლები”. ამის შესახებ შრომის, ჯანმრთელობისა და სოციალური დაცვის მინისტრმა, ზაზა სოფრომაძემ საზოგადოებრივ მაუწყებელზე, გადაცემა “მთავარის” ეთერში ისაუბრა.
“სრულდება საზოგადოების დაკვეთა,რომ არ შეიძლება ყველა მოქალაქეს, მიუხედავად მისი შემოსავლისა, ჰქონდეს სამედიცონო მომსახურების ერთი და იგივე პაკეტი. მოქალაქეები, რომელთაც წელიწადში 40 ათასზე მეტი შემოსავალი აქვთ, გადიან საყოველთაო ჯანდაცვის პაკეტიდან. ასევე ცვლილებაა იმ პაკეტებში,რომლითაც სარგებლობენ თვეში 1000 ლარზე მეტი შემოსავლის მქონე მოქალაქეები, ამ შემთხვევაში კერძო დაზღვევაზე გადასვლა ნებაყოფლობითია.
უკვე გამოცხადდა ბაზრის კვლევა, გამოცხადდება ტენდერი და უშუალოდ დაიწყება უფასო მედიკამენტების პროგრამა, ეს არ გადაცდება 1 ივნისს. კორუფციული თუ სხვა რისკების თავიდან ასაცილებლად, მედიკამენტების გაცემა მოხდება ექიმის ნებართვით, რეცეპტით, თანხა იქნება მედიკამენტის ღირებულების 10 %, თუმცა არაუმეტეს 1 ლარისა. ამით ისარგებლებს 670 ათასი საქართველოს მოქალაქე, დაახლოებით მოსახლეობის 20%. ამ მედიკამენტების გაცემისთვის, ქსელებს შორის დამატებითი ტენდერი იქნება გამოცხადებული” , – განაცხადა ზაზა სოფრომაძემ.
მანანა როღობერიძე
Discussion about this post