თბილისის ბაღების მართვის სააგენტოში, მოქალაქეების ნაწილის მოთხოვნასთან დაკავშირებით, რომელიც საბავშვო ბაღების ფანჯრებსა და აივნებზე გისოსების დამონტაჟებას ეხება, განმარტება გაკეთდა. როგორც სააგენტოს ხელმძღვანელმა თემურ თორდინავამ განაცხადა, ბაღების ფანჯრებზე გისოსების დამონტაჟება სახანძრო უსაფრთხოებიდან გამომდინარეა აკრძალული. ინფორმაციას 1tv ავრცელებს.
თუმცა, თორდინავას განცხადებით, ბაღების შენობების ფანჯრებზე ე.წ. მოძრავი გისოსების დამონტაჟების თაობაზე განხილვა უკვე დაწყებულია.
“ისეთი გადაწყვეტილება უნდა მივიღოთ, რომ არ დავარღვიოთ სახანძრო უსაფრთხოების, ასევე ოთახების განათებისა სტანდარტები, და ამავდროულად გავაძლიეროთ ბავშვების უსაფრთხოება”, – აღნიშნა თორდინავამ.
შეგახსენებთ, 25 სექტემბერს ზემო ფონიჭალაში 206-ე ბაგა-ბაღის მეორე სართულიდან ბავშვი გადმოვარდა.
