„პრეზიდენტს შეუძლია ეს პროც
ესი ამ კვირაშივე დაასრულოს. თუმცა,ის აშკარად ზეწოლის ქვეშაა ოპოზიციური ჯგუფების მხრიდან“, – კონსტიტუციის საბოლოო პროექტის შესახებ მმართველი გუნდის წარმომადგენელმა, საპროცედურო საკითხთა კომიტეტის თავმჯდომარემ, გიორგი კახიანმა „იმედზე“, გადაცემა „ქრონიკის“ ეთერში ისაუბრა.
„ვფიქრობდით ხომ არ მივსულიყავით შეხვედრაზე, მაგრამ პრეზიდენტი არის თავის მიერ დაწყებული პროცესის ტყვეობაში. 20 პარტია შეიკრიბა, შეიმუშავეს პროექტი, ლოგიკურია,რომ არსებობს ურთიერთდამოკიდებულება და პრეზიდენტმა რომ პრაგმატული გადაწყვეტილება მიიღოს, მოჰყვება კონტრრეაქცია. არ მგონია,რომ თავის თავში პრეზიდენტი ამ ძალას ნახავს.
პრეზიდენტი თუ ჩვენს შემოთავაზებას ასახავს, მზად ვართ გავითვალისწინოთ. უახლოეს კვირაში დასრულდებოდა ეს თემა. სხვა შემთხვევაში კი გაზაფხულამდე ვერ დასრულდება. შეუძლებელია სხვანაირად მესამედან მეორე მოსმენამდე დაბრუნება. ჩვენ ჩვენი მხრიდან მზად ვართ ნებისმიერ დროს შევხვდეთ, თუ კონკრეტულ შედეგზე ვიქნებით ორიენტირებული. სპექტაკლების დადგმა არ არის ჩვენი მცდელობა. პრეზიდენტს აქვს ორი გადაწყვეტილების მიღების შესაძლებლობა: ან ახალი სპექტაკლი შემოგვთავაზოს, ან პრაგმატულად დაასრულოს პროცესი მოკლე დროში“ , – განაცხადა გიორგი კახიანმა.
მანანა ღოღობერიძე
