სახალხო დამცველის აპარატის ცნობით, 2017 წლის 2 ოქტომბერს ომბუდსმენმა შპს „აი ჯი დეველოფმენტ ჯორჯიას“ ორსულობის ნიშნით დისკრიმინაციის დადგენის შესახებ მიმართა.
აპარატის ცნობით, კომპანიამ ორსულობის გამო შვებულებაში მყოფ თანამშრომელს მუშაობაზე ხელშეკრულება არ გაუგრძელა.
“სახალხო დამცველმა მიიჩნია, რომ განმცხადებელსა და კომპანიას შორის გაფორმებული მომსახურების ხელშეკრულება, რომელიც სამართლებრივი ურთიერთობის გაგრძელების ვალდებულებას არ წარმოშობს, თავისი არსით, შრომითსამართლებრივი ხელშეკრულება იყო, ვინაიდან განმცხადებლის მიერ შესრულებული სამუშაო კომპანიისთვის ფუნქციურად მნიშვნელოვანი იყო, აუცილებელი იყო მის მიერ სამუშაოს პირადად შესრულება, განმცხადებელი ექვემდებარებოდა დამსაქმებელს და ის სამუშაოს გარკვეული ფუნქციური წესების მიხედვით ასრულებდა. ასევე, ქონება, რომელიც აუცილებელი იყო სამუშაოს შესრულებისთვის, კომპანიის საკუთრებას წარმოადგენდა”, – წერია სახალხო დამცველის განცხადებაში.
ომბუდსმენის აპარატი დასძენს, რომ კომპანიის მიერ ხელშეკრულების გაგრძელებაზე უარი თანამშრომლის ორსულობამ განაპირობა. სახალხო დამცველი მოუწოდებს კომპანიას “აღმოფხვრას დისკრიმინაციული მოპყრობის შედეგი, მომავალში თავი შეიკავოს შრომით ურთიერთობებში ორსულობის ნიშნით დისკრიმინაციული მოპყრობისგან და საქმიანობა წარმართოს თანასწორობის პრინციპის დაცვით.”