„გურამ კაშიას დავუდასტურებ ჩემს დიდ პატივისცემას და მინდა ვუთხრა,რომ თუ ერთი წამით მაინც შეეპარება ეჭვი,რომ დღეს საქართველოში არიან ადამიანები,რომლებიც მის გვერდით არ დადგებიან ბოლომდე, მინდა ვუთხრა, რომ ეს ასე არ მოხდება“ , – ამის შესახებ ჟურნალისტმა,ტელეწამყვანმა ნინო ზაუტაშვილმა „ტვ პირველზე“, „რეაქციას“ ეთერში ისაუბრა.
„პროპაგანდისგან ძალიან შორს იყო ის აქცია,რომელიც ჩაატარა გურამ კაშიამ. მან საქართველოს სახელი ღირსეულად წარმოაჩინა, თუნდაც ამ ფაქტით. მედია ძალიან ვცოდავთ,როდესაც ვაშუქებთ ამ აქციას. დიდ ყურადღებას და რესურსს ამაზე ნუ დავხარჯავთ,რადგან მსგავსი აქციები არ იმსახურებს ამხელა ყურადღებას. მათი დაკვეთა ზუსტად ის არის,რომ ბევრმა ადამიანმა ნახოს ეკრანზე, ბევრი ადამიანი დაჯდეს და ილაპარაკოს მათზე. დიდი ნაწილი, რომელმაც თავი დააღწია საბჭოთა კავშირის მარწუხებს, ასე არ ფიქრობს“, – განაცხადა ნინო ზაუტაშვილმა.
გურამ კაშიას სოლიდარობის ჟესტის შესახებ ჟურნალისტმა ნანუკა ჟორჟოლიანმაც ისაუბრა.
„დარწმუნებული ვარ, რომ გია კორკოტაშვილმა იცის რა არის კარგი, რა ცუდი და არის თუ არა ეს ყველაფერი პროპაგანდა. ალბათ დაფინანსებისთვის ხდება ეს ყველაფერი. „ქართული მარში“-ს არსებობა აღარ დადგება დღის წესრიგში, თუ ისინი რაღაცაზე არ იყვირებენ. ისინი არჩევენ ისეთ თემებს,რომელიც სენსიტიურია საზოგადოებისთვის, განსაკუთრებით ახალგაზრდობისთვის. ირჩევენ თემებს,რომელიც კონფლიქტურია ასევე ინტერნეტსივრცეში, ხმაური სჭირდებათ.
მედია უკვე უნდა შევთანხმდეთ იმაზე, რომ ასეთი თემები არ გავაშუქოთ, სადაც გამოდიან ადამიანები და სხვების ჩამოხრჩობას, დაგმობას ითხოვენ. ნაკრებიდან არავინ გარიცხავს კაშიას, ეს ძალიან სასაცილო მოთხოვნაა. არც ერთი ფეხბურთელი ამას სერიოზულად არ აღიქვამს. თუ „ქართულ მარშს“ არ გავაშუქებთ და არ მივალთ, ასეთი ტიპის აქციები აღარ იარსებებს“ , – განაცხადა ნანუკა ჟორჟოლიანმა.
მანანა ღოღობერიძე
