„ბოლო წლებში პირველად მოხდა, როდესაც გარდაცვალებამ გადააჭარბა შობადობას 400 ადამიანით“ , – ამის შესახებ სტატისტიკის ეროვნული სამსახურის უფროსის მოადგილემ, თენგიზ ცეკვავამ „იბერიაზე“ გადაცემა „ცენზურის გარეშეს“ პირდაპირ ეთერში ისაუბრა.
„დემოგრაფიული სტატისტიკის მონაცემებისთვს ორი მნიშვნელოვანი წყარო არსებობს.2017 წლის შობადობა-გარდაცვალების მაჩვენებელი უკავშირდება საქართველოში რეგისტრირებულ ფაქტებს. მეორე წყარო არის 2014 წლის საყოველთაო აღწერის მონაცემები, ამ მრავალფეროვანი მაჩვენებლების საფუძველზე მივიღეთ ეს შედეგი.
90-იან წლებში საბჭოთა კავშირის რღვევის შემდეგ ნეგატიური პროცესების შესაბამისად არსებითად იკლო მოსახლეობამ, მიგრაციული ნაკადები გაიზარდა, ქვეყნიდან მილიონზე მეტი ადამიანი გავიდა. ისინი ვინც დაიბადნენ 90-იან წლებში, ფაქტობრივად 50%-ით ჩამორჩებოდნენ 80-იანი წლების მაჩვენებელს. შესაბამისად ბავშვები,რომლებიც იბადებიან დღეს, არიან შვილები იმათი, ვინც დაიბადა 90-იან წლებში.
მიუხედავად იმ სტერეოტიპებისა, თითქოს საქართველოში ცოტა ბავშვი იბადება, ეს მაჩვენებელი ევროპის ქვეყნებთან შედარებით საკმაოდ მაღალია. საქართველოში მთავარი ფაქტორი დემოგრაფიული კატასტროფისთვის არის უარყოფითი მიგრაცია. უახლოეს წლებში ეს ნეგატიური ტენდენცია გაგრძელდება, თუმცა მაშინ,როდესაც ის ადამიანები,რომლებიც დაიბადნენ 2007-2008 წლებში გახდებან მშობლები, გვექნება უკეთესი მდგომარეობა“ , – განაცხადა თენგიზ ცეკვავამ.
მანანა ღოღობერიძე