„ტრამპმა ამ გადაწყვეტილებით თავის ტკივილი თავის თავს კი არა, მსოფლიოს გაუჩინა. პალესტინის პრობლემა თითქოს მივიწყებული იყო და უცებ წამოიწია ისევ.მცირე, მაგრამ უკან დასახევი გზაც დატოვებულია ტრამპის სიტყვაში“, – დონალდ ტრამპის გადაწყვეტილებით იერუსალიმის ისრაელის დედაქალაქად გამოცხადების შესახებ აღმოსავლეთმცოდნე გიორგი სანიკიძემ „იმედზე“, გადაცემა „ქრონიკის“ ეთერში ისაუბრა.
„თვითონ მხარეებმა უნდა გადაწყვიტონ თუ რა საზღვრებში მოხდება იერუსალიმის დედაქალაქად გამოცხადება და გაიყოფა თუ არა. ხისტ გამოცხადებას ოდნავი უკან დასახევი გზებიც ახლავს. ახლო აღმოსავლეთის ქვეყნები ბუნებრივად უარყოფითად შეხვდნენ, ისევე როგორც დასავლეთის ქვეყნები, ფაქტობრივად მარტო აღმოჩნდა ტრამპი.
იერუსალიმის საკითხი უახლესი ისტორიის 40-იანი წლებიდან გახდა აქტუალური. 1948 წლის შემდეგ იერუსალიმის დასავლეთ ნაწილს აკონტროლებს ისრაელი, 1967 წლამდე აღმოსავლეთ ნაწილი ოკუპირებული ჰქონდა იორდანიის სამეფოს, ამის შემდეგ კი ისრაელმა გამოაცხადა,რომ იერუსალიმი მისი მარადიული და განუყოფელი დედაქალაქია. საპირისპიროა პალესტინელთა პოზიცია. მათი აზრით, პალესტინელთა სახელმწიფოს შექმნის წინაპირობა არის აღმოსავლეთ იერუსალიმის დედაქალაქად გამოცხადება.
ტრამპს ახასიათებს ექსტრავაგანტული გადაწყვეტილებები. 70 წლის მანძილზე შედეგი არ არსებობს და ტრამპი ფიქრობს,რომ ამ გადაწყვეტილებით დადგება რამე შედეგი, თუმცა ამის შანსები მწირია. ძნელი წარმოსადგენია,რომ ტრამპის ამ ნაბიჯს სამშვიდობო პროცესის პოზიტიურად დასრულება მოჰყვეს. ტრამპის პოლიტიკა ახლო აღმოსავლეთთან გამიჯნულია, თითქოს – საუდის არაბეთი ჩემთან არი, ირანი ჩემი მტერია“ , – განაცხადა გიორგი სანიკიძემ.
მანანა ღოღობერიძე