ბაღი ბავშვის თვითრეალიზებისთვის ყველაზე შესაფერისი ადგილია. იმისათვის, რომ პატარებმა თავი დაცულად და კომფორტულად იგრძნონ, ოჯახური გარემოსა და სიმყუდროვის შექმნაა საჭირო. კარგ გარემოსთან ერთად კი, ჯანსაღი საკვები ბავშვის სათანადოდ განვითარებისთვის ერთ-ერთ პრივილეგიას უნდა წარმოადგენდეს. „თბილისი თაიმსი“ ეკო-ბაღის დირექტორს, ანი რობაქიძეს ესაუბრა, მისი თქმით ეს სააღმზრდელო დაწესებულება პატარებს სწორედ თბილ და ამავდროულად ჯანსაღ გარემოს სთავაზობს. უფრო კონკრეტულად, თუ რატომ ეკო-ბაღი, ინტერვიუდან შეიტყობთ.
რამდენი ხანია, რაც ეკო ბაღი ფუნქციონირებს? საიდან გაჩნდა სახელწოდება ეკო-ბაღი?
-,,ეკო” ბაღი 3 წელია ფუნქციონირებს. ბევრი ფიქრის შემდეგ გადავწყვიტეთ ბავშვებისთვის ეკოლოგიურად სუფთა და ჯანსაღი გარემო შეგვექმნა, სადაც პატარები უმეტეს დროს გაატარებდნენ.
ეკო ბაღში სააღმზრდელო პროცესი როგორ მიმდინარეობს, ბავშვები რა სახის აქტივობებში არიან ჩართულები?
– სააღმზრდელო პროცესი მშვიდ და თბილ გარემოში მიმდინაროებობს.
პატარები სხვადასხვა აქტივობებში არიან ჩართულები, რომელიც მათი გონებრივი განვითარებისთვის უმთავრესია: ჭადრაკი,ორიგამის ხელოვნება,გაძლიერებული ცეკვის და სიმღერის გაკვეთილები (სტუდიის წრე). გვაქვს გასვლითი ღონისძიებები სხვადასხვა საწარმოსა და ობიექტებზე.
ერთ ჯგუფში, დაახლოებით, რამდენი ბავშვია? სხვა ბაღებისგან რა გამოგარჩევთ?
– ჯგუფში 15-18 ბავშვი ირიცხება. ეკო ბაღი ჯანსაღი კვებით გამოირჩევა. უნდა აღინიშნოს, რომ თითოეულ ბავშვთან ინდივიდუალურად ვმუშაობთ. გვაქვს ბავშვთა გასართობი ლაბირინთი. მაღალკვალიფიციური კადრები გვყავს, რომლებიც ჩვენს მასწავლებლებს მუდმივად ამზადებენ და, გარდა ამისა, საჭიროების შემთხვევაში მშობლებთანაც მუშაობენ.
პედაგოგების შერჩევისას რას ითვალისწინებთ?
– ჩვენთან მაღალკვალიფიციური პედაგოგები ირჩევიან და ჩვენთვის პრიორიტეტია, რომ აღმზრდელს ბავშვთან ბეგობრული და თბილი ურთიერთობის ჩამოყალიბება შეეძლოს. აღმზრდელ-პრედაგოგმა პატარებს უნდა აგრძნობინოს, რომ მათი მეგობარია და არა ,,მონსტრი”, ამ მიდგომით ბავშვებიც და მასწავლებლებიც მოგებულები დარჩებიან. პედაგოგი პატარებისგან მეტ პატივისცემას მოიპოვებს, ბავშვი კი თვითდაჯერებულობას, რომ ის არის ადამიანი, რომელიც უყვართ და მისი აზრიც გასათვალისწინებელია .
როგორც ვიცი, ეკო-ბაღის სასწავლო პროცესში ფსიქოლოგიც მონაწილეობს – როგორ ფიქრობთ, რა როლი აქვს ფსიქოლოგს სააღმზრდელო დაწესებულებაში?
– ფსიქოლოგია ეს არის ის სფერო, რომელიც ნებისმიერი ასაკის ადამიანს ეხმარება გააცნობიეროს ესა თუ ის სირთულე, რაც მის გარშემოა და დაეხმაროს მის დაძლევაში. დღევანდელი სიტუაციიდან გამომდინარე საკმაოდ დიდი პრობლემის წინაშე ვდგავართ, განსაკუთრებით პატარები და ალბათ ამის გამომწვევი მიზეზებია კომპიუტერი, ტელეფონები და ონლაინ თამაშები. ამიტომაც ჩვენს ბაღთან ფსიქოლოგი ნინო კერესელიძე თანამშრომლობს, რომელიც თითოეულ ბავშვს ინდივიდუალურად ხვდება, აკვირდება ჯგუფშიც და მშობლებს შესაბამისს რეკომენდაციებს აძლევს.
როგორ ფიქრობთ, ბავშვს ყველაზე მეტად რა სჭირდება?
– სიყვარული და სითბო! პატარა ფაქტობრივად მთელი დღე სწყდება დედას და ოჯახს ,მას კი ეს დანაკლისი ჩვენ უნდა ავუნაზღაუროთ და თავი ,,სახლში” ვაგრძნობინოთ.
რამდენად დიდია კონკურენცია, ვის თვლით მთავარ კონკურენტად?
-კონკურენცია, რა თქმა უნდა, დიდია. მთავარ კონკურენტად მე მაინც ,,ოჯახს” ვთვლი, რაც ასეც უნდა იყოს. თითოეული ბაღი ცდილობს იყოს გამორჩეული, ჩვენ ვთვლით, რომ მთავარია ბავშვების კეთილდღეობა და მათი ფიზიკური თუ ფსიქიკური ჯანმრთელობა. ბაღი ადგილია, სადაც ბავშვები სოციალურ ურთიერთობებში პირველ ნაბიჯს დგავენ, სწორედ ამიტომ ამ კონტაქტის მაქსიმალური ხარისხი უკვე ბაღის პასუხისმგებლობაა.
როგორია თქვენი ბაღის სამომავლო გეგმები?
– სამომავლო გეგმები ძალიან დიდი! ვაპირებთ, რომ ბავშვების სწორი და ჯანსაღი განვითარებისთვის კიდევ ბევრი სიახლე და ინოვაცია შევიტანოთ. ვფიქრობ, გავფართოვდეთ და გავხსნათ ,,ეკო” ბაღის ფილიალები. ამჟამადაც, გვაქვს აქციები, როგორც ერთი, ისე ოჯახიდან რამდენიმე ბავშვისთვის.
ძირითადად, რა პრობლემები აწუხებთ ბავშვებს, რა შეიძლება იყოს ამ პრობლემების გამომწვევი მიზეზი, ამ და სხვა საკითხებზე „თბილისი თაიმსს“ ეკო ბაღის ფსიქოლოგი, ნინო კერესელიძე ესაუბრა
ნინო კერესელიძე: ,,უმნიშვნელოვანესია როგორი ურთიერთობა აქვს ბავშვს მშობელებთან, ეს ხშირად, შესაძლოა, ბავშვის პრობლემების სათავეც იყოს. თუ უფრო კონკრეტულად ვიტყვით, ბავშვებში ხშირია აგრესია, ასევე შიშები. შიშების დიდი რაოდენობა მაინც ასაკობრივია, მაგრამ რა თქმა უნდა, თითოეულ სიტუაციას ინდივიდუალურად ვუდგებით.
რაც შეეხება ასაკობრივ კატეგორიას, ყველა ასაკს აქვს თავისი სირთულეები თუ ეტაპები აქვს, რომლებიც ბავშვმა უნდა გაიაროს. მთავარია აღმზრდელები სწორად და გულისხმიერად მიუდგნენ მათ.
ბაღი, ეს არის პირველი სოციალური გარემო ბავშვისთვის, სადაც ის მარტო, მშობლის გარეშე იწყებს მოძრაობას. ეს არის გარემო, სადაც ბავშვმა თავისი როლი, უნარები ფუნქციები თანატოლებთან უნდა წარმოაჩინოს. ზოგადად, ბაღში ხდება ისეთი სოციალური უნარების დამუშავება, რომლებიც შემდგომში ადამანის ჯანმრთელი ფუნქციონირებისთვის საფუძვლად იქცევა. სწორედ ამიტომ, მნიშვნელოვანია მშობელმა სწორად შეარჩიოს გარემო, სადაც ბავშვი დღის დიდ ნაწილს გაატარებს“.
ნინო ზარიძე
