თბილისში ეზოების, სკვერების, ქუჩებისა და მოედნების დაზიანება დასჯადი ხდება. ცვლილებები „ადმინისტრაციულ სამართალდარღვევათა კოდექსში“ შედის.
კერძოდ, ცვლილებების თანახმად, დასჯადი ქმედება ხდება არამარტო თბილისის ტერიტორიაზე ეზოების, სკვერების, ქუჩებისა და მოედნების თვითნებური გადათხრა, არამედ მათი დაზიანებაც.
კანონპროექტის ინიციატორები არიან საქართველოს პარლამენტის წევრები: ზაზა გაბუნია, არჩილ თალაკვაძე, მარიამ ჯაში, ბექა ოდიშარია, ალექსანდრე ქანთარია.
როგორც ცვლილებათა პროექტის განმარტებით ბარათშია აღნიშნული, ცვლილებებით სამართალდარღვევის სახის დაზუსტება მოხდება, რადგან კანონმდებლობაში დაზიანება პირდაპირ მითითებული არ იყო, რაც ხშირ შემთხვევაში პრაქტიკაში გაუგებრობას იწვევდა.
ცვლილების მიხედვით, აღნიშნულ დარღვევაზე იზრდება ჯარიმის ოდენობები. კერძოდ, ფიზიკური პირის შემთხვევაში 500-ლარიანი ჯარიმა ორმაგდება და 1000 ლარი ხდება, იურიდიული პირის შემთხვევაში, 2000-ლარიანი ჯარიმა – 3000 ლარამდე იზრდება.
მკაცრდება ასევე „კულტურული მემკვიდრეობის შესახებ“ კანონით გათვალისწინებულ დამცავ ზონაში დადგენილი ზემოთხსენებული სამართალდარღვევის ჩადენისთვის დასაკისრებელი ჯარიმის ოდენობაც. ფიზიკური პირის შემთხვევაში 1000 ლარიანი ჯარიმა ორმაგდება და 2000 ლარი ხდება, იურიდიული პირის შემთხვევაში კი 4000 ლარიანი ჯარიმა 6000 ლარამდე გაიზრდება.
ნინი მაზიაშვილი
