თბილისის ვიცე-მერის, ირაკლი ხმალაძის ინფორმაციით, ახალი მიწისქვეშა პარკინგები ფასიანი იქნება. როგორც ხმალაძემ საკითხის კომენტირებისას განაცხადა, აღნიშნული პროექტი წინასაარჩევნო დაპირების შესაბამისად ხორციელდება.
“დღეს მივიღეთ უმნიშვნელოვანესი გადაწყვეტილება, სამ ლოკაციაზე გამოვაცხადეთ ინტერესთა გამოხატვა და ბიზნესს მოვუწოდეთ აქტიურობისკენ. სამი ლოკაცია ეს არის – გეგეშიძის სკვერის, ვაგზლისა და ვარკეთილის მეტროს მიმდებარე ტერიტორიები. ჩვენ მიგვაჩნია, რომ ეს არის აუცილებელი პროექტები. ამ ადგილებზე პარკინგებზე საკმაოდ მაღალი მოთხოვნაა. ჩვენ მაქსიმალურად შევუწყობთ ხელს ბიზნესს, რათა ეს პროექტები განხორციელდეს. ჯამში ეს არის 715 ადგილი. მიწისქვეშა პარკინგები არის კერძო ინვესტიციები, ბიზნესპროექტები და ადგილები იქნება ფასიანი, თუმცა ქალაქში გვაქვს საკმაოდ ბევრი მუნიციპალური პარკინგი, რომელიც ასევე ფასიანია, თუმცა დაწესებულია წლიური გადასახადი. ინტერესთა გამოხატვა ითვალისწინებს პირველ ეტაპზე ტექნიკური და ეკონომიკური კვლევის ჩატარებას, ეს დაახლოებით, 3-4 თვის განმავლობაში გაგრძელდება, ამის შემდეგ კი გაფორმდება მშენებლობის ხელშეკრულება და დაიწყება მშენებლობა იმ შემთხვევაში, თუ კვლევა დაადგენს, რომ ამ პროექტების განხორციელება არის შესაძლებელი და რა თქმა უნდა, უსაფრთხო”, – განაცხადა ირაკლი ხმალაძემ.