ოჯახის ღირებულებებთან ბრძოლა, ღმერთთან ბრძოლაა და ეს არის ადამიანის ამაღლებასთან, განწმენდასა და ცხონებასთან ბრძოლა, – ამის შესახებ სრულიად საქართველოს კათოლიკოს-პატრიარქის მოსაყდრემ მეუფე შიომ, ქაშუეთის ტაძარში, ქადაგებისას განაცხადა. მანვე ამაღლების დღესასწაულის მნიშვნელობაზე ილაპარაკა.
„გილოცავთ დღევანდელ დღეს. ამაღლებას კიდევ მეორე მნიშვნელობა აქვს, უფლის ამაღლებით აღსრულდა ის დანიშნულება, რომლისთვისაც ადამიანი იყო შექმნილი დასაბამიდანვე. თავისი ზეცად აღსვლით, ადამიანის ბუნება არის თანაზიარი ძე ღმერთის ხელმწიფების და დიდების. უფალმა ინებოს ჩვენი ერის ამაღლება. ამაღლების დღესასწაული დაემთხვა ოჯახის სიწმინდის დღეს, რომელიც მისმა უწმინდესობამ დაგვიდგინა, როგორც ეროვნული ზეიმი და ჩვენ ყველანი მას მადლობას ვუხდით ამისთვის. როგორც არასდროს, ისე იყო საჭირო ოჯახის სიწმნიდის დაცვის დღე. ვინაიდან ოჯახის დანგრევის სტატისტიკა არის საგანგაშო, სულ უფრო მეტად გაისმის მოწოდებები ანტიოჯახური ღირებულებების დაკანონებისა და, რა თქმა უნდა, ეს ყველაფერი შემაშფოთებელია, ამიტომაც დღეს ჩვენ ვიკრიბებით, რომ დავიცვათ ოჯახის სიწმინდე, ოჯახური ღირებულებები და რატომ? იმიტომ რომ, რასაც უკავშირდება ამაღლება“, – თქვა პატრიარქის მოსაყდრემ.