როგორ დავიცვათ მსხვერპლი ძალადობისგან – დეპუტატები სისხლის სამართლის კოდექსში შესატანი ცვლილებებისთვის ემზადებიან. ცვლილების მიხედვით, შემაკავებელი ან დამცავი ოქმის დამრღვევი, არა ადმინისტრაციული წესით, არამედ სისხლის სამართლის კოდექსით დაისჯება.
ეს კი ითვალისწინებს ჯარიმას, საზოგადოებისთვის სასარგებლო შრომას 180-დან 280 საათამდე ან თავისუფლების აღკვეთას ერთი წლის ვადით. კიდევ ერთი ცვლილების მიხედვით, გენდერული და გენდერული იდენტობის ნიშნით ჩადენილი დანაშაული პასუხისმგებლობის დამძიმებელი გარემოების კატეგორიაში გადადის.
ცვლილებების ინიციატორი შინაგან საქმეთა სამინისტროა. საკითხი ბიუროს სხდომაზე დღეს დარეგისტრირდა.
25 მაისის მთავრობის სხდომაზე, მთავრობამ ოჯახური ძალადობის შესახებ შსს-ს კანონპროექტი დაამტკიცა ცვლილების მიხედვით:
- ოჯახური დანაშაულის ჯგუფში გაერთიანებული ნებისმიერი ძალადობრივი დანაშაულის განმეორებით ჩამდენი პირების მიმართ სანქციები მკაცრდება. წარსულში ოჯახური დანაშაულისთვის ნასამართლევი პირის მიერ აღნიშნული დანაშაულის განმეორებით ჩადენა შეფასდება, როგორც არაერთგზის ჩადენილი ოჯახური დანაშაული და მოძალადე პირველ შემთხვევაზე გაცილებით მკაცრად დაისჯება;
- გენდერული ნიშნით მკვლელობა, თვითმკვლელობამდე მიყვანა, ჯანმრთელობის მძიმე და ნაკლებად მძიმე დაზიანება გათვალისწინებულია, როგორც დამამძიმებელი გარემოება და ამგვარი დისკრიმინაციული მოტივით დანაშაულის ჩამდენი პირების მიმართ სანქციები მკაცრდება;
- ასევე, მკაცრდება სანქცია ოჯახში ძალადობისთვის (126-ე მუხლი). ნაცვლად დღეს არსებული სასჯელისა – 1 წლამდე თავისუფლების აღკვეთა, დანაშაულის ჩამდენი პირი დაისჯება 2 წლამდე ვადით თავისუფლების აღკვეთით;
- დამამძიმებელი გარემოება ხდება ოჯახის წევრის მკვლელობა.
