საზოგადოების სულიერი განვითარებისთვის მნიშვნელოვან როლს თამაშობს თეატრის არსებობა. უძველესი დროიდან მოყოლებული თეატრს ტკბობისა და კათარზისის ფუნქცია აქვს. ამ მოსაზრებას გარკვეულწილად იზიარებდა ილია ჭავჭავაძე და ერის აღზრდისა და განვითარების ერთ-ერთ უმნიშვნელოვანეს პირობად სწორედ ქართული თეატრის დაარსება მიაჩნდა.
დღეს რა მდგომარეობაა რუსთაველის თეატრში, მაყურებელთა რაოდენობა გაიზარდა თუ შემცირდა, ასევე თეატრის დაფინანსების წყაროზე, მომავალში დაგეგმილ პრემიერებზე „თბილისი თაიმსს“ ესაუბრა რუსთაველის თეატრის საზოგადოებასთან ურთიერთობის სამსახურის უფროსი ია შერაზადიშვილი.
თქვენი აზრით, გაიზარდა თუ შემცირდა საზოგადოების ინტერესი თეატრების მიმართ ბოლო 3 წლის განმავლობაში?
ჩვენი აზრით, საზოგადოების ინტერესი თეატრების მიმართ ბოლო სამი წლის განმავლობაში უფრო გაიზარდა, ვიდრე შემცირდა. ბევრი მიზეზი და ხელისშემწყობი ფაქტი არსებობს, მათ შორის ახალი თეატრალური ძიებები, საბჭოთა კავშირის და საქართველოს სახალხო არტისტი, გამოჩენილი რიჟისორის რობერტ სტურუას დაბრუნება ქართულ თეატრში და საინტერესო თეატრალური ფესტივალები.
შეიცვალა თუ არა მაყურებელი, მისი დამოკიდებულება თეატრის მიმართ , თქვენი აზრით რით გამოირჩევა რუსთაველის თეატრი სხვა თეატრებისგან?
რასაკვირველია, იცვლება თავად ცხოვრება და იცვლება ადამიანთა მოთხოვნილებები. ცხადია, იცვლება მაყურებლის დამოკიდებულება თეატრისადმი. როგორც უკვე ავღნიშნე, მოთხოვნილება თეატრის მიმართ უფრო იზრდება. იმისათვის, რომ საზოგადოებისთვის ერთფეროვანი და მოსაწყენი არ გახდეს, თეატრი მუდმივ ძიებაშია. საჭიროა ახლებური ხედვა, ახალი თეატრალური ფორმები.
ყოველ პროფესიულ თეატრს თავისი ესთეტიკა აქვს, თავისი ტრადიციები. რაც შეეხება რუსთაველის თეატრს, იგი გამოირჩევა თავისი ისტორიით. რუსთაველის თეატრის ესთეტიკასა და ტრადიციებს ათეული წლების განმავლობაში ქმნიდნენ უდიდესი ქართველი რეჟისორები: კოტე მარჯანიშვილი, სანდრო ახმეტელი, დოდო ალექსიძე, მიხეილ თუმანიშვილი, არჩილ ჩხარტიშვილი, თემურ ჩხეიძე, რობერტ სტურუა. თეატრი დღესაც ერთგული რჩება ამ ტრადიციებისა, რასაც დიდ ყურადღებას აქცევენ და აფასებენ მაყურებლები.
რა ასაკის მაყურებლები უფრო ხშირად სტუმრობენ თქვენს თეატრს?
თეატრს სტუმრობს ყველა ასაკის მაყურებელი. სასიხარულოა, რომ ბოლო პერიოდში ახალგაზრდების რიცხვმა იმატა, რაც იმის მაჩვენებელია, რომ თეატრი ყველა დროში და ყველასთვის მიმზიდველია.
რომელი სპექტაკლი უფრო აქტუალურია და სარგებლობს მეტი პოპულარობით, რა პრინციპით არჩევთ სპექტაკლებს თქვენი თეატრისთვის?
კონკრეტულად რომელიმე სპექტაკლის დასახელება მიჭირს, ალბათ გასაკვირი არ უნდა იყოს, რომ რობერტ სტურუას სპექტაკლები მაყურებლის განსაკუთრებული სიყვარულით სარგებლობს.
სპექტაკლის არჩევისას ჩვენ ვითვალისწინებთ ყველანაირ მაყურებლის მოთხოვნას, ამიტომ რუსთაველის თეატრის რეპერტუარი მრავალფეროვანია.
თეატრის დაფინანსების წყაროებს რა წარმოადგენს? საიდან ფინანსდება?
ამასთან დაკავშირებით ავღნიშნავ, რომ რუსთაველის თეატრს ეძლევა სუფსიდია სახელმწიფოსგან. აგრეთვე აქვს ალტერნატიული შემოსავალი სპონსორინგის სახით.
იგეგმება თუ არა ახლო მომავალში ახალი გასტროლები ან სხვა სიახლეები დაკავშირებლი თეატრთან?
რუსთაველის თეატრში ყოველთვის იგეგმება საინტერესო სიახლეები. ამჯამად მიმდინარეობს მოლაპარაკებები გასტროლებთან დაკავშირებით. უახლოეს მომავალში კი თეატრი მაყურებელს ორ საინტერესო პრემიერას შესთავაზებს, რომელიც არავის გულგრილად არ დატოვებს.
30.09.13
მარინა ფიდუაშვილი
