“მენაშენეთა ასოციაცია” ბინის შეძენისთვის სწორი არჩევანის გასაკეთებლად მომხმარებლებს მორიგ რეკომენდაციას სთავაზობს.
“თბილისი თაიმსი” ტექსტს უცვლელი სახით გთავაზობთ.
„რეკომენდაცია #2 – სწორად შეარჩიეთ ბინა:
რაციონალურად შეარჩიეთ ბინის საერთო ფართი – ნუ იყიდით უზომოდ დიდ ბინას, ბინის შერჩევისას გაითვალისწინეთ ოჯახის წევრების რაოდენობა შესახლებიდან 5 წლის განმავლობაში. განსაზღვრეთ მათთვის საკმარისი ოთახების რაოდენობა და, ასევე, ოთახების ფართის მოცულობები.
დააზუსტეთ ბინიდან არსებული ხედის პერსპექტივა მომავალში – გაარკვიეთ, აპირებს თუ არა კომპანია ან სხვა დეველოპერი სამომავლოდ მიმდებარე ტერიტორიაზე მშენებლობის დაწყებას. დარწმუნდით, რომ სამომავლო მშენებლობები არ გამოიწვევს თქვენი ბინიდან ხედის დაკარგვას.
სწორად შეაფასეთ ბინის ბუნებრივი განათების, განიავების, გათბობის შესაძლებლობები.
გაარკვიეთ, გათვალისწინებულია თუ არა წინასწარ, პროექტით, კონდიციონერისა და გათბობის ქვაბის ადგილი. თუ – კი, ეს ნიშნავს, რომ სახლის იერსახე დროთა განმავლობაში არ დამახინჯდება.“
მენაშენეთა პირველი რეკომენდაცია სამშენებლო კომპანიის სწორად შერჩევის საკითხებს ეხებოდა.
როგორც ინფორმაციაშია აღნიშნული, „მენაშენეთა ასოციაცია“ სულ 8 რეკომენდაციას, ეტაპობრივად გაავრცელებს.
ნინი მაზიაშვილი
