ბავშვთა და ახალგაზრდობის ეროვნული ცენტრის პროექტი – „ახალგაზრდა ხელოვანი“ – კონკურსი დამწყები პროზაიკოსებისა და მხატვრებისათვის საზეიმოდ დაიხურა. კონკურსის მიზანია მოზარდების ხელით შეიქმნას წიგნი, რომელიც უსინათლო და მცირემხედველი თანატოლებისთვის იქნება განკუთვნილი. ასევე, აღმოაჩინოს ნიჭიერი პროზაიკოსები და მხატვრები.
მონაწილეებს სიტყვით მიმართეს პროექტის კონსულტანტებმა – პოეტმა პაატა შამუგიამ, მწერალმა და ლიტერატურის კრიტიკოსმა ლექსო დორეულმა, მხატვრებმა გოგა ჯაფარიძემ და ნინო ქოქიაშვილმა. მათ თავიანთი რჩეულები დაასახელეს და საჩუქრები გადასცეს.
კონკურსების რჩეულები ლიტერატურაში ელენე მესხი და ანდრია კიკონიშვილი გახდნენ, ხოლო მხატვრობაში ელენე არაბიძე და ლუკა გოგიტაძე.
მხატვრულ კონკურსში კონსულტანტების მიერ შერჩეული 12 მონაწილე წელიწადის თორმეტი თვის თემატიკაზე ნახატებს, ხოლო ლიტერატურული კონკურსის 24 მონაწილე ლიტერატურულ ნაწარმოებებს ქმნიდა.
მონაწილეების მიერ შექმნილი ნახატებით 2019 წლის კედლის კალენდარი აიკინძება, ნაწარმოებებით კი წიგნის კრებული გამოიცემა. წიგნი ასევე ბრაილის შრიფტით დაიბეჭდება და განკუთვნილი იქნება მცირემხედველთათვის და უსინათლოებისთვის.
