2018 წლის 25 ოქტომბერს საქართველოს სახალხო დამცველის აპარატის პრევენციისა და მონიტორინგის დეპარტამენტის უფროსი ნიკა კვარაცხელია წამებისა და სხვა სასტიკი, არაადამიანური ან დამამცირებელი მოპყრობის ან სასჯელის პრევენციის ქვეკომიტეტის წევრად (SPT) 2019-2022 წლების ვადით აირჩიეს.
შვეიცარიის ქალაქ ჟენევაში გამართულ OPCAT–ის წევრი ქვეყნების მე-7 შეხვედრაზე საქართველოს კანდიდატმა 55 ხმით გაიმარჯვა. ქვეკომიტეტში 13 ვაკანტურ ადგილზე 20 ქვეყნის კანდიდატი იყო წარდგენილი. უნდა აღინიშნოს, რომ საქართველოს ისტორიაში წამებისა და სხვა სასტიკი, არაადამიანური ან დამამცირებელი მოპყრობის ან სასჯელის პრევენციის ქვეკომიტეტის წევრად საქართველოს კანდიდატი პირველად შეირჩა.
საქართველოს კანდიდატი ნიკა კვარაცხელია 2013 წლიდან მუშაობს საქართველოს სახალხო დამცველის აპარატში. იგი აქტიურად მონაწილეობს წამების წინააღმდეგ მიმართულ გლობალურ კამპანიებში და ხელს უწყობს წამებისა და სხვა სასტიკი, არაადამიანური ან დამამცირებელი მოპყრობის ან სასჯელის წინააღმდეგ კონვენციის ფაკულტატური ოქმის (OPCAT) შესახებ ცნობიერების ამაღლებას.
გაეროს წამებისა და სხვა სასტიკი, არაადამიანური ან დამამცირებელი მოპყრობის ან სასჯელის პრევენციის ქვეკომიტეტი წარმოადგენს გაეროს სახელშეკრულებო ორგანოს, რომელსაც გააჩნია ორმაგი მანდატი. კომიტეტი ახორციელებს დამოუკიდებელ საერთაშორისო რეგულარულ ვიზიტების ოქმის ხელმომწერ სახელმწიფოებში არსებულ თავისუფლების აღკვეთისა და შეზღუდვის ადგილებში წამებისა და სხვა სასტიკი, არაადამიანური ან დამამცირებელი მოპყრობის ან სასჯელის თავიდან აცილების მიზნით და ასევე ოქმის იმპლემენტაციის მიზნით ხელს უწყობს პრევენციის ეროვნული მექანიზმების დაარსებასა და ფუნქციონირებას. კომიტეტი მუშაობას შეუდგა 2007 წელს, აერთიანებს 25 დამოუკიდებელ ექსპერტს და წარმოადგენს გაეროს სისტემაში მოქმედ ერთ-ერთ ყველაზე დიდ სახელშეკრულებო ორგანოს.