ნორვეგიის პარლამენტში საქართველოსთან მეგობრობის ჯგუფის ხელმძღვანელის, ნორვეგიის პარლამენტის ყოფილი თავმჯდომარის ულემიქ თომესენის განცხადებით, ნორვეგია მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას და მისთვის მიუღებელია ის აგრესია, რასაც რუსეთის ფედერაცია საქართველოს მიმართ ავლენს. ამის შესახებ ნორვეგიის პარლამენტარმა საქართველოს საგარეო საქმეთა მინისტრთან, დავით ზალკალიანთან შეხვედრისას განაცხადა.
ნორვეგიის პარლამენტში საქართველოს მეგობართა ჯგუფის წარმომადგენლებთან შეხვედრაზე დავით ზალკალიანმა ვრცლად ისაუბრა ოკუპირებულ რეგიონებში შექმნილ ვითარებაზე, ადამიანის უფლებების უხეშ დარღვევებზე, მათ შორის ტატუნაშვილი -ოთხოზორიას სიცოცხლის ხელყოფის ფაქტებზე. მინისტრმა კიდევ ერთხელ გაუსვა ხაზი მსგავს შემთხვევებზე საერთაშორისო საზოგადოების მკაცრი რეაგირების მნიშვნელობას. ამ კონტექსტში, მან ისაუბრა ტატუნაშვილი-ოთხოზორიას სიაზე, რომელიც მხარდაჭერილია ევროპარლამენტის მიერ.
დავით ზალკალიანმა ყურადღება გაამახვილა საქართველოს მთავრობის სამშვიდობო პოლიტიკაზე და აღნიშნა, რომ კონფლიქტის დარეგულირების ერთადერთ გზად საქართველო, ქვეყნის განვითარებას და საოკუპაციო ხაზს მიღმა მცხოვრები მოსახლეობისთვის პროგრესის და შესაძლებლობების შეთავაზებას განიხილავს.
საქართველო-ნორვეგიის ორმხრივ თანამშრომლობაზე საუბრისას, მხარეებმა ყურადღება გაამახვილეს სავაჭრო-ეკონომიკური მიმართულებით თანამშრომლობის დიდ პოტენციალზე.
როგორც ნორვეგიელმა დეპუტატმა აღნიშნა, საქართველო გატარებული რეფორმებით – განსაკუთრებით სასამართლო სისტემასა და კორუფციასთან ბრძოლის მიმართულებით, სამაგალითოა და მიმზიდველი ქვეყანა ხდება ნორვეგიული ბიზნესისთვის.
„ნორვეგიასა და საქართველოს შორის არსებობს მჭიდრო კავშირები. უმნიშვნელოვანესია სავაჭრო-ეკონომიკური ურთიერთობების განვითარება. საქართველოს აქვს მნიშვნელოვანი მიღწევები სასამართლო სისტემის რეფორმირებისა და კორუფციის წინააღმდეგ ბრძოლის მიმართულებით. საქართველო უსაფრთხო ქვეყანაა და ეს მნიშვნელოვანი ფაქტორია ნორვეგიული ბიზნესისთვის, რომ განახორციელონ ინვესტიცია საქართველოში. მათთვის მნიშვნელოვანია თავი იგრძნონ დაცულად და იყვნენ ისეთ ქვეყანაში, სადაც შეეძლებათ საქმიანობის უსაფრთხოდ წარმართვა. ჩვენ გვაქვს მნიშვნელოვანი ინვესტიციები ენერგო სექტორში, ასევე ნიშანდობლივია, რომ იზრდება ნორვეგიელი ტურისტების ინტერესი საქართველოს მიმართ“- განაცხადა ულემიქ თომესენმა.
ნორვეგიაში ვიზიტის ფარგლებში საქართველოს საგარეო საქმეთა მინისტრმა ასევე შეხვედრა გამართა ნორვეგიის პარლამენტის თავდაცვისა და უსაფრთხოების კომიტეტის წარმომადგენლებთან.
პარლამენტარებმა დადებითი შეფასება მისცეს თბილისში ნორვეგიის საელჩოს გახსნის გადაწყვეტილებას. შეხვედრაზე საუბარი შეეხო საქართველო-ნორვეგიის თანამშრომლობას თავდაცვისა და უსაფრთხოების სფეროში. კიდევ ერთხელ დადასტურდა ნორვეგიის მხარდაჭერა საქართველოს ნატო-ში ინტეგრაციის გზაზე.
მინისტრმა ნორვეგიელ პარლამენტარებს ასევე ინფორმაცია მიაწოდა საქართველოს საკონსტიტუციო რეფორმაზე, რომლის მიხედვითაც ქვეყანა თანდათან ტრანსფორმირდება ძლიერ საპარლამენტო რესპუბლიკად.
აღსანიშნავია, რომ საქართველოსთან მეგობრობის ჯგუფი ნორვეგიის პარლამენტში 2018 წელს პარლამენტის ყოფილი თავმჯდომარის ულემიქ თომესენის ინიციატივით დაარსდა.
