2008 წლის საქართველო-რუსეთის აგვისტოს ომის შემდეგ რუსეთმა ტერიტორიების უკანონოდ მითვისება ახალი მეთოდებით დაიწყო – ხელოვნური ბარიერების, ე.წ. საზღვრის აღმნიშვნელი ნიშნულების, ხელოვნური ბარიერების, ღობეებისა და მავთულხლართების საშუალებით. უკანონო ბორდერიზაციის პირველი ფაქტი 2009 წლის აგვისტოში დაფიქსირდა – რუსმა სამხედროებმა ე.წ. საზღვრის აღმნიშვნელი ნიშნულები დაამონტაჟეს, თუმცა ევროკავშირის სადამკვირვებლო მისიის ჩარევის შემდეგ, მალევე აიღეს.
2009 წლიდან მოყოლებული დღემდე რუსეთი შეუფერხებლად აგრძელებს საქართველოს ტერიტორიების უკანონოდ მითვისებას.
საქართველოს უსაფრთხოების სამსახურმა უკანონო ბორდერიზაციასთან დაკავშირებით ინფორმაცია “თბილისი თაიმსს” 2018 წლის 14 ნომერის ანგარიშით მიაწოდა:
„ოკუპირებული ცხინვალის რეგიონის მიმართულებით საოკუპაციო ხაზის საერთო სიგრძე 350 კმ-ზე მეტს შეადგენს. რუსეთის საოკუპაციო ძალების მიერ საოკუპაციო ხაზის გასწვრივ ჯამში დაახლოებით 52 კმ-ზე მეტი სიგრძის მავთულხლართები და ღობეები დუშეთის, გორის, ქარელის, კასპის, ხაშურის ონისა და საჩხერის მუნიციპალიტეტების სოფლების გასწვრივ არის გავლებული.
ოკუპირებული აფხაზეთის მიმართულებით საოკუპაციო ხაზის სიგრძე დაახლოებით 145 კმ-ია, ხოლო უკანონოდ მოწყობილი ღობეების მავთულხლართების, ტრანშეებისა და მიწათხრილების საერთო სიგრძე 48 კმ-ზე მეტია. ე.წ. ბორდერიზაციის უკანონო პროცესი ოკუპირებული გალის რაიონის შემდეგი სოფლების მიმდებარე ტერიტორიებზე ფიქსირდება: ფიჩორი, ოტობაია, ნაბაკევი, თაგილონი, დიხაზურგა, საბერიო და ლეკუხონა.“ – “თბილისი თაიმსთან” საუბრისას განაცხადა საქართველოს უსაფრთხოების სამსახურის ადმინისტრაციის უფროსმა ნინო გიორგობიანმა.
გარდა იმისა, რომ „ჩვენი ერთმორწმუნე და მოძმე ერი“ ტერიტორიებს უკანონოდ ითვისებს, 2008 წლიდან 2017 წლის 20 ნოემბრის ჩათვლით უკანონოდ დააკავეს 2951 ადამიანი. მოცემული რიცხვები ოკუპირებული ცხინვალის რეგიონში 1109 ადამიანს მოითვლის, ხოლო ოკუპირებული აფხაზეთის რეგიონში გაცილებით მეტს – 1842 ადამიანს (მონაცემებს უკანონოდ დაკავებული ადამიანების შესახებ ნეტგაზეთი ავრცელებს. შენიშვნა: ამ მონაცემების ცდომილება ხუთიდან ათ პროცენტამდე მერყეობს).
„ნიშანდობლივია, რომ რუსეთის ფედერაციის მიერ განხორციელებული ოკუპაცია მხოლოდ უკანონო „ბორდერიცაზიის“ პროცესით არ გამოიხატება და მან ნეგატიური ასახვა ჰპოვა საოკუპაციო ხაზის გასწვრივ მდებარე ყველა სოფელსა თუ იქ მცხოვრებ ადგილობრივზე.
ხაზგასმით უნდა აღინიშნოს, რომ საოკუპაციო ხაზი წარმოადგენს პირობით ცნებას და არა ფიქსირებულ ხაზს, რომელსაც გააჩნია სამართლებრივი საფუძველი, შესაბამისად, საოკუპაციო ხაზის „საზღვრად“ მოხსენიება არამაართებულია“, – ნათქვამია საქართველოს უსაფრთხოების სამსახურის მიერ მოწოდებულ განცხადებაში.
მიხეილ ლუხუტაშვილი
