ელენე გედევანიშვილი სოჭის ოლიმპიადაში მონაწილეობაზე უარს იმ შემთხვევაში იტყვის, თუ საქართველოს ოლიმპიური კომიტეტი მიზანშეწონილად არ მიიჩნევს საქართველოს მონაწილეობას ოლიმპიადაში. ამის შესახებ სპორტსმენი “ყველა სიახლისთვის” მიცემულ ინტერვიუში აცხადებს.
მისი თქმით, დაელოდება გადაწყვეტილებას, მანამდე კი ვარჯიშს გააგრძელებს.
“რაც უნდა გადაწყვიტოს ხელისუფლებამ, მიმაჩნია, რომ სპორტსმენები პოლიტიკაში არ უნდა ჩავერიოთ. ჩვენ ჩვენი საქმე უნდა ვაკეთოთ და ვარჯიში განვაგრძოთ”, – აცხადებს გედევანიშვილი.
რაც შეეხება რუსეთში ვარჯიშის შეჩერებას, გედევანიშვილი ამბობს, რომ მას შემდეგ, რაც რუსეთ-საქართველოს შორის ურთიერთობა დაიძაბა, იქ ვარჯიშის საშუალება აღარ მისცეს.
“რუსებისგან წყენა ისევ მახსოვს. ძალიან უსამართლოდ მომექცნენ, მას შემდეგ იქ აღარ ჩავსულვარ. ვცდილობ, ამ თემას არ შევეხო ხოლმე. მიუხედავად ჩემი წყენისა, მზად ვარ, ყველაფერი დავივიწყო და ჩემი ქვეყნის წარმოსაჩენად სოჭში ჩავიდე, რა თქმა უნდა იმ შემთხვევაში, თუ ოლიმპიური კომიტეტი სოჭის ოლიმპიადაში მონაწილეობაზე უარს არ იტყვის”, – განაცხადა გედევანიშვილმა.
09.10.13
