საქართველო გახდა საინვესტიციოდ საინტერესო ადგილი და ეს მაძლევს საშუალებას, ვთქვა, რომ 2019 წლის მსოფლიო ეკონომიკური ფორუმი განსაკუთრებით წარმატებული იყო საქართველოსთვის, – ამის შესახებ საქართველოს პრემიერ-მინისტრმა მამუკა ბახტაძემ ჟურნალ „ეკონომისტთან“ ინტერვიუში განაცხადა.
მთავრობის მეთაურმა ისაუბრა იმ ინიციატივების შესახებ, რომლებიც დავოსში გამართული შეხვედრებისას მსოფლიოს უმსხვილესი კომპანიების ხელმძღვანელებს გააცნო. მათ შორისაა კომპანიების ონლაინ-რეგისტრაცია, საბანკო ანგარიშების გახსნა, რაც 30-ზე მეტი ქვეყნის მოქალაქეებზე გავრცელდება, ასევე – ახალი საკანონმდებლო ინიციატივა, რომლის მიხედვითაც მსხვილი ტრანსნაციონალური კომპანიები, რომლებიც თავიანთ მთავარ ოფისებს გახსნიან საქართველოში და აქედან მოემსახურებიან რეგიონს, განსაკუთრებულ საგადასახადო შეღავათებს მიიღებენ.
„იგივე ეხება მაღალტექნოლოგიურ კომპანიებს, რომლებიც კვლევების და სამეცნიერო ინფრასტრუქტურის ნაწილს შექმნიან საქართველოში. ეს დაგვეხმარება მეტი მაღალტექნოლოგიური ინვესტიციის მოზიდვაში. პირდაპირი უცხოური ინვესტიციების რაოდენობა კრიტიკულად მნიშვნელოვანია და ამავე დროს ისიც, რომ იზრდებოდეს ინვესტიციების ხარისხი და მივიღოთ ინვესტიცია, რომელსაც განსაკუთრებით მაღალი დამატებითი ღირებულების შექმნის პოტენციალი ექნება. ეს ყველაფერი უკვე აისახა კონკრეტულ მოლაპარაკებებში კონკრეტულ კომპანიებთან. განსაკუთრებით სასიხარულო იყო, რონ არ გვიწევდა საუბარი რომელიმე ერთი ან ორი სექტორის წარმომადგენელთან. ეს მნიშვნელოვანია ეკონომიკის დივერსიფიკაციისთვის. საუბარია სამომხმარებლო პროდუქციაზე, განახლებად ენერგიაში სერიოზულ ინვესტიციაზე, ლოგისტიკაზე, რაც სამწუხაროდ რჩება დაბრკოლებად. ჩვენ აუცილებლად გვეყოლება ინვესტორები მაღალ ტექნოლოგიებში და საკანონმდებლო ბაზის დახვეწის შემდეგ – ხელოვნური ინტელექტის ნაწილშიც. ეს ყველაფერი მაძლევს საშუალებას ვთქვა, რომ 2019 წლის მსოფლიო ეკონომიკური ფორუმი განსაკუთრებით წარმატებული იყო საქართველოსთვის, მაგრამ 2020 წელს ჩვენ უნდა გვქონდეს ამ ახალი ინიციატივების კონკრეტული შედეგები – რომ მსოფლიო ლიდერი კომპანიები ინტერესდებიან ჩვენი შეთავაზებებით“, – განაცხადა პრემიერმა.
