ჩვენს ყოველდღიურობას საინტერესოსა და ფერადს თავადვე ვხდით. საკუთარი გემოვნებიდან, ხასიათიდან და მისწრაფებებიდან გამომდინარე, ვგეგმავთ საათებს და ვცდილობთ, ყოველი წუთი იყოს ნაყოფიერი. რაც უფრო მრავალმხრივია ჩვენი ინტერესი, მით უფრო სასიამოვნოა მთელი ჩვენი დღე.
ესმა ტყებუჩავა ხელოვნების არაერთი მიმართულებითაა დაინტერესებული. მისი მუსიკალური ისტორია 6 წლის ასაკიდან იწყება, ჩვენი ყურადღება კი მისმა სამხატვრო უნარებმა დაიმსახურა. ესმა „თბილისი თაიმსს“ საკუთარი ბიოგრაფიიდან მცირე ნაწილს უამბობს.
მუსიკალურ გარემოში გავიზარდე, 6 წლიდან ფორტეპიანოზე ვუკრავდი, 16 წლამდე, მახსოვს დაუსრულებელი კონცერტები, გათენებული ღამეები ფორტეპიანოსთან, ორკესტრის ხმა. შემდეგ იყო სამხატვრო აკადემია, მეტის გაგების სურვილი, ასე შევიძინე ხელოვნებათმცოდნეობა/რესტავრაცია/მხატვრობა. ამ პროფესიებმა შემავსო და მამოგზაურა საოცარ სამყაროში, რომელიც ბავშვობიდან მიზიდავდა.
ძალიან საინტერესო ნამუშევრები გაქვთ – მათ რისგან ქმნით?
ნამუშევრების ხატვაში თავისუფალი ვარ, ვხატავ ტილოზე, ცარცის ქაღალდზე, ტილოს ქაღალდზე ზეთის საღებავებით. საძერწი მასალა კი ფუნჯების გარდა ნებისმიერი რამ, რაც კი საინტერესო ფორმის მიღებაში დამეხმარება.
მხატვრობაში რა მიმართულებებით ხართ დაინტერესებული?
სამწუხაროდ, ცხოვრების წესიდან გამომდინარე, მხატვრობა ჩემი დროის დიდ მონაკვეთს ვერ მოიცავს, მყავს ორი შვილი, სამსახური, მეუღლე, ამიტომაც, ვხატავ პერიოდულად. მაგრამ მაქვს პერიოდები, როდესაც, დროის უქონლობის მიუხედავად, იმდენად დიდია ხატვის სურვილი, რომ ვხატავ შეუჩერებლად. რამდენიმე დღე ვფიქრობ წინასწარ ნამუშევარზე, ფერზე, ფორმაზე, შემდგომ კი ერთი ამოსუნთვით, სწრაფი მონასმებით ვასრულებ ხატვას. დაბრუნება არ მიყვარს, ვიყურები ყოველთვის წინ და ველოდები რაღაც ახალს.
რა არის ის დეტალი, რაც თქვენს ყველა ნახატს ახასიათებს?
ჩემი ნამუშევრების დამახასიათებელი დეტალი ფერთა გამაა,¾ მობრუნებული წაგრძელებული ფიგურები, ფერი აუცილებლად პასტელურია, თბილი. ფერი რიგ შემთხვევებში უფრო დიდ როლს თამაშობს, ვიდრე ფორმა. და .. სიყვარული, ყველა ნამუშევარში დიდი სიყვარულია, ძალიან ბევრს ვუყურებ ხატვის შემდგომ ჩემს ნამუშევარს,. კრიტიკული ვარ, ბევრჯერ ყოფილა შემთხვევა, რომ ნახატზე ზემოდან გადამიხატავს და სულ სხვა რამ შემიქმნია.
მათ შეკვეთითაც ამზადებთ თუ მხოლოდ საკუთარი გემოვნებით?
ვხატავ იმ რეალობიდან გამომდინარე, რაშიც ვიმყოფები – იმ განყობით, რა განწყობაზეც ვარ ან მინდა, რომ ვიყო.
გარდა ამისა, ხელოვნების სხვა მიმართულებებით თუ ხართ დაინტერესებული?
ჩემი დღის დიდი ნაწილი ამ ეტაპზე წიგნის რესტავრაციას უჭირავს, ეს ჩემთვის იგივე ხელოვნებაა. სწრაფი ნაბიჯით მივდივარ სამსახურში, ვჯდები და ვიწყებ მაგალითად 1709 წლის ,,სახარები“-ს რესტავრაციას, წიგნის – რომელიც საქართველოში 1709 წელს, ვახტანგ მეექვსის მიერ მოწყობილ პირველ სტამბაში დაიბეჭდა. რესტავრაციას/კონსერვაციას ვუტარებ ჩემს გუნდთან ერთად კულტურული მემკვიდრეობის უძვირფასეს ნიმუშებს, რომლებიც ქართული ბეჭდური ხელოვნების უმაღლეს საფეხურზე დგას.
საბოლოოდ კი მგონია, რომ ადამიანს ბევრი რამის კეთება შეუძლია, რადგან ინტერდისციპლინარული პერსონაა. მთავარია, მოვინდომოთ და მოვუსმინოთ საკუთარ თავს. მე მიყვარს ის, რასაც ვაკეთებ დღის სხვადასხვა მონაკვეთში, ვარესტავრირებ თუ სამეცნიერო ნაშრომს ვწერ, ვუკრავ თუ ვხატავ, მეუღლესთან/ბავშვებთან ერთად ვატარებ დროს, რადგან ეს ჩემი ცხოვრებაა.
