25 დეკემბერს სარულიად საქართველოს კათოლიკოს პატრიარქის აღსაყდრებიდან 38 წელი გავიდა. ამ დღესთან დაკავშირებით სამების საკატედრო ტაძარში სადღესასწაულო საღმრთო ლიტურგია შესრულდა. მსახურებას სხვადასხვა ეპარქიებიდან ჩამოსული მღვდელმთავრები და მთავრობის მოქმედი თუ ყოფილი წევრები ესწრებოდნენ. სადღესასწააულო მსახურების დასრულების შემდეგ პატრიარქმა მრევლს ქადაგებით მიმართა.
“ძველ რომაელებს აქვთ გამოთქმული ერთი სიბრძნე: “შეიცან თავი შენი”. აი, ამ 38 წლის მანძილზე ბევრი რამ გაკეთდა ღვთის მადლით, ღვთის წყალობით, მაგრამ მე ვერ შევიცანი თავი ჩემი. ეს, ალბათ, სისუსტის ბრალია. იმედი მაქვს, რომ მომავალში ნაწილობრივ მაინც შევიცნობ ჩემს თავს.
მე ვმადლობ უფალს მისი დიდი წყალობისათვის. ამ წლების მანძილზე მუდამ ვგრძნობდი უფლის სიახლოვეს, რომელსაც უჭირავს ჩემი ხელი და მატარებს ამ ურთულეს გზებზე. მინდა ვთქვა ერთი რამ, რომ უფალს ძალიან უყვარს საქართველო, ქართველი ხალხი, მთელი მსოფლიო. ძალიან ხშირად მიგზავნის განსაცდელს, მაგრამ არასდროს არ მშორდება.
წყალობა უფლისა და მადლი ღვთისა გფარავდეთ თქვენ და საქართველოს. დალოცვილი და გახარებული გამყოფოთ მამაზეციერმა!” – ბრძანა უწმინდესმა.
სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ინტრონიზაცია 1977 წ. 25 დეკემბერს სვეტიცხოვლის ტაძარში მოხდა.
მისი პატრიარქობის პერიოდში საქართველოს ეკლესიის წმიდათა დასს მრავალი წმიდანი შეემატა. გაიხსნა ეკლესიები და მონასტრები, აშენდა ახალი ტაძრები. დღეისთვის სულ 46 ეპარქიაა, პატრიარქის ჩათვლით კი, 47 მღვდელმთავარი, მათგან 2 ტიტულარულია. გაიზარდა ბერ-მონაზვნებისა და სასულიერო პირების რაოდენობა. დღეისთვის საქართველოში დაახლოებით 2 ათასამდე მოქმედი ეკლესია-მონასტერია და 3 ათასამდე სასულიერო პირი და ბერ-მონაზონი.
უწმიდესისა და უნეტარესის ლოცვა-კურთხევით თანამედროვე ქართულ ენაზე გამოიცა ბიბლია, საღვთისმეტყველო კრებული, გამოდის საეკლესიო ჟურნალ-გაზეთები, საეკლესიო კალენდრები, საღვთისმეტყველო წიგნები. საპატრიარქოსთან შეიქმნა მისიისა და ევანგელიზაციის, ხალხური რეწვის, საგარეო-ეკონომიკური, საფინანსო-სამეურნეო, სიმწმიდეთა მოძიების, სოფლის მეურნეობის, ჯანმრთელობის დაცვისა და სოციალური უზრუნველყოფის განყოფილებები, პრესცენტრი, ხუროთმოძღვრების, საეკლესიო გალობის აღდგენისა და შემსწავლელი ცენტრი, სასწავლო კომიტეტი. საპატრიარქოში ფუნქციონირებს ახალგაზრდული ორგანიზაც, საქველმოქმედო ფონდი.
ილია მეორე ოცამდე ხატისა და რამდენიემ საგალობელის ავტორია. ყოველწლიურად იზრდება მისი ნათლულების რიცხვი.
სოფიკო ნინიკაშვილი
