საქართველოს კულტურისა და სპორტის მინისტრი მიხეილ გიორგაძე, მოადგილე შალვა გოგოლაძესთან ერთად, თბილისის პარაცენტრში ქართველ პარალიმპიელებს და საქართველოს პარალიმპიური დელეგაციის წევრებს შეხვდა.
საქართველოს პარალიმპიური დელეგაცია პირველად არსებობის მანძილზე, 2018 წლის პიონგჩანგის პარალიმპიურ თამაშებზე მიიღებს მონაწილეობას, რომელიც 9-18 მარტს პიონგჩანგში გაიმართება.
საქართველოს ზამთრის პარალიმპიური თამაშების 2 ლიცენზია აქვს მოპოვებული. სამხრეთ კორეაში საქართველოს ღირსებას თემურ დადიანი და ნინო საბაშვილი დაიცავენ, რომლებიც სათხილამურო კროსში იასპარეზებენ. მინისტრთან შეხვედრას პარალიმპიელ სპორტსმენებთან და მწვრთნელებთან ერთად, საქართველოს პარალიმპიური კომიტეტის პრეზიდენტი შალვა მაისურაძე, მერიის განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა, ასევე პარასპორტსმენები და ჟურნალისტები ესწრებოდნენ.
საქართველოს პარალიმპიური დელეგაცია პიონგჩანგში 5 მარტს საღამოს გაფრინდება.
მიხეილ გიორგაძე (კულტურისა და სპორტის მინისტრი)“ მივესალმები ჩვენს პარალიმპიელებს, საამაყო სპორტსმენებს, რომლებმაც ძალიან დიდი შრომა გასწიეს საიმისოდ რომ პარალიმპიური თამაშების ლიცენზიები მოეპოვებინათ. პარალიმპიურ სპორტში მოპოვებული წარმატება, გაათმაგებულ ძალისხმევას და შემართებას მოითხოვს, ამიტომაც თქვენი თითოეული შედეგი და წარმატება საერთაშორისო ასპარეზზე ასმაგად დასაფასებელია. უღრმესი მადლობა დელეგაციის თითოეულ წევრს გაწეული შრომისთვის, წარმატებებს გისურვებთ პიონგჩანგში, სადაც საქართველოს ღირსებას დაიცავთ. მინდა კიდევე ერთხელ დაგიდასტუროთ ჩემი პატივისცემა, მოგეხსენებათ, რომ პარალიმპიური სპორტი იყო და არის სამინისტროს ერთ-ერთი უმთავრესი პრიორიტეტი, სრულ მხარდაჭერას გპირდებით.“
შალვა მაისურაძე (პარალიმპიური კომიტეტის პრეზიდენტი): „საქართველოს პარალიმპიური დელეგაცია პირველად მიიღებს მონაწილეობას ზამთრის პარალიმპიურ თამაშებზე. პიონგჩანგში ჩვენ ორი სპორტსმენით წარვსდგებით. სასიხარულოა, რომ ისტორიაში პირველად მოგვიწევს ზამთრის პარალიმპიური თამაშების გახსნის ცერემონიაზე გამოსვლა და ზოგადად, მოხარულები ვართ, რომ ამჯერად ზამთრის პარალიმპიური თამაშების დიდი ოჯახის წევრები გავხდით.“
