რუსული ბაზარი ქართული ხილ-ბოსტნეულისთვის გაიხსნა. ამის შესახებ დღეს გამართულ პრესკონფერენციაზე საქართველოს სოფლის მეურნეობის მინისტრმა, შალვა ფიფიამ განაცხადა.
მისი თქმით, დღეს, რუსეთის ვეტერინალური და ფიტოსანიტარული კონტროლის ფედერალური სამსახურის ხელმძღვანელმა ხელი მოაწერა დოკუმენტს, რომლის შედეგად, მოხსნილია შეზღუდვები საქართველოდან რუსეთში შემდეგი ხილის: თხილის, ყურძნის, ვაშლის, მსხლის, კომშის, ციტრუსებისა და სხვა მცენარეული პროდუქციის ექსპორტზე.
როგორც მინისტრმა აღნიშნა, რუსეთის ფედერაციაში იმყოფება საქართველოს დელეგაცია, რომელსაც ხელმძღვანელობს სურსათის ეროვნული სააგენტოს ხელმძღვანელი, ზურაბ ჩეკურიშვილი. ჩამოთვლილი პროდუქციისთვის რუსული ბაზარი 14 ოქტომბრიდან გაიხსნება.
“თქვენ მოგეხსენებათ, რომ ახალი მთავრობა ხელისუფლებაში მოსვლისთანავე მეთოდურად მუშაობდა ქართული პროდუქციის რუსულ ბაზარზე დაბრუნებაზე. ამან გამოიღო შედეგი, როდესაც ივნისში რუსული ბაზარი ქართული ალკოჰოლური სასმელების, მინერალური წყლებისა დაბალი რისკის შემცველი პროდუქციისთვის გაიხსნა”, – განაცხადა შალვა ფიფიამ.
10.10.13
