მსოფლიოს მრავალ ქვეყანაში სექსუალური განათლება არამხოლოდ საჭირო ინფორმაციად, არამედ სკოლაში აუცილებლად გასავლელ კურსად ითვლება. ისქვეყნები, სადაც სექსუალური განათლება ისწავლება, უფრო დაცულია ნაადრევი ქორწინებებისგან და დაუგეგმავი ფეხმძიმობის შემთხვევებისგან. ნაკლებიასქესობრივი გზით გადამდები დაავადებების სტატისტიკა.
მიუხედავად ბევრი მტკიცებულებისა და სხვადასხვა სტატისტიკისა, საქართველოში სექსუალური განათლება რჩება ტაბუდადებულ თემად. სექსუალური განათლების მოწინააღმდეგეები ძირითადად ერთ არგუმენტს იყენებენ – „ ჩვენ არ გვქონდა განათლება, თუმცა – როგორც ხედავთ, გვყავს შვილები და არაფერი დაგვიკარგავს.“
UNESCO – ს სექსუალური განათლების საერთაშორისო ტექნიკური სახელმძღვანელოს პრინციპების მიხედვით, ხატია ახალაიამ ონლაინ პლატფორმის დახმარებით სექსუალური განათლების სალექციო კურსის ჩატარება დაიწყო. მიუხედავად იმისა, რომ ხატიას უმთავრესი მიზანი იყო ახალგაზრდების ინფორმირება და იმ პრობლემების პრევენცია, რომლებიც შესაძლოა სექსუალური განათლების ნაკლებობამ გამოიწვიოს, მან საპასუხოდ მიიღო აგრესია და მუქარა გაუპატიურებით. გაკვეთილების ავტორი ჩვენთან საუბრობს იმ მიზეზებზე, რომლებმაც უბიძგეს დაეწყო სალექციო კურსი:
„ადამიანებს, რომელთაც სჯეროდათ ამ საკითხების სასიცოცხლოდ მნიშვნელოვნება და აუცილებლობა განსაკუთრებით ჩვენნაირი ქვეყნისთვის, სადაც ამ ტიპის განათლების არ არსებობა უამრავ პრობლემას იწვევს, იწყებდნენ თავიანთი წვლილის შეტანას ამ ძალიან რთულ პროცესში, თუმცა მათ არასდროს ჰქონდათ მხარდაჭერა ადგილობრივი მთავრობისგან რომლებიც სექსუალური განათლების ინსტრუმენტალიზებით იყვნენ დაკავებული… ბავშვობაში მახსოვს პატარა ბროშურა დაიბეჭდა, რომელიც სექსუალური განათლების საკითხებს მოიცავდა ბავშვისთვის გასაგებ ენაზე-ილუსტრაციებით, საკმაოდ კარგი ბროშურა იყო, მიუხედავად ამისა ულტრამემარჯვენეებმა დაარბიეს გამომცემლობა და საჯაროდ დახიეს წიგნები, არავინ დაუსჯიათ …
გვინდოდა შეგვექმნა ონლაინ პლატფორმა, რომელიც მოზარდებს საშუალებას მისცემდა წარმოდგენა შექმნოდათ სექსუალური განათლების უმარტივეს საკითხებზე. ჩვენ სპეციალური გადამზადება გავიარეთ საერთაშორისო ექპერტებთან, ფსიქოლოგებთან, ექიმებთან და ვეცადეთ ჩვენი რეალობისთვის და საჭიროებებისთვის მოგვერგო, ორგანიზაციაში დავნერგეთ საერთაშორისო სტანდარტი რომელიც თავად გკარნახობს რომელი ასაკისთვის რა ტიპის ინფორმაციაა რელევანტური, თუმცა ჩვენ ეს ასაკი დავწიეთ.
კითხვაზე, თუ რა რისკებთან გვაქვს საქმე მაშინ, როცა მოზარდს არ აქვს ინფორმაცია სექსუალურ მომწიფებასთან დაკავშირებით – ხატია გვპასუხობს : „პუბერტატის პერიოდი ადამიანის განვითარების პროცესში ეს ერთ-ერთი რთული ეტაპია, ამიტომ აუცილებელია მოზარდი დეტალურად ინფორმირებული შეხვდეს ამ პერიოდს. ჰორმონალური აფეთქება რომელიც ამ ასაკს ახასიათებს, ხშირ შემთხვევაში მოწყვლადს ხდის ბავშვს სექსუალური ძალადობების მიმართ. ამიტომაცაა აუცილებელი სექსუალური განათლება, რათა გავაძლიერით მოზარდი, რომ ძალადობის შემთხვევაში დროულად ითხოვოს შველა. სექსუალობა დაბადებიდან გვაქვს, შესაბამისად – ადამიანის ფუნდამენტური უფლებაა მიიღოს კომპლექსური ინფორმაცია გარდატეხის თავისებურებებზე, როცა მშობელი, სკოლა ამას ვერ აკეთებს, ბუნებრივია ირღვევა ბავშვის უფლება.
აუცილებელია, საერთაშორისო ექსპერტთა მიერ გადამზადდნენ ისეთი ადამიანები, რომლებისთვისაც ეს საკითხები ღირებულებაა. მათ უნდა ჰქონდეთსწორი სტრატეგია ამ მიმართულებით, რათა რეალური, საერთაშორისო დონეზე ნაცადი- აღიარებული უალტერნატივო მეთოდი დავუპირისპიროთ და ბავშვთა მიმართ ძალადობების, სგგი-ების შემთხვევებისა და ორსულობების პრევენცია მოვახდინოთ.“
-ხატია, სიმართლეა, რომ სიცოცხლის მოსპობითა და გაუპატიურებით გემუქრებოდნენ?
-სამწუხაროდ, სიმართლეა.10 თვის წინ განვაცხადეთ, 15 მდე ადამიანი ფორმალურად გამოიკითხა.ულტრამემარჯვენე ორგანიზაციის ლიდერი (გურამ ფალავანდიშვილი) გამოკითხვის დასრულებისთანავე აგრძელებდა მუქარებს “ლაივ რეჟიმში” პირდაპირ პოლიციის შენობის წინ.მთავრობის ხელში სექსუალური განათლება ინსტრუმენტია, (ეს რიგ შემთხვევებში ბლოკავსორგანიზაციების მიერ გაწეულ შრომას) ამას ამყარებს ის ფაქტიც, რომ ვუჩივლეთ 50-მდე ადამიანს, აქედან 35 ოფიციალური სამთავრობო ტროლ-ბოტი აღმოჩნდა. ისინი დეზინფორმაციას ავრცელებდნენ და საზოგადოების ნაწილის აჟიტირებას იწვევდნენ ჩემი მისამართით.
გამოხმაურებები კარგი მარკერი აღმოჩნდა იმისა, რომ გაგვეგო მიმდინარე მთავრობისა და საზოგადოების განწყობები. ძალიან ბევრი დადებითი გამოხმაურება გვქონდა რეგიონებიდან, ემიგრაციაში მყოფი ქართველებისგან, საქართველოში ეთნიკურად სომეხი და აზერბაიჯანელი მოსახლეობისგან, რასაც ამ ფონზე არ ველოდით.
ხატია ახალაიას გაკვეთილების შესახებ უკუკავშირი ორგვარი იყო : ზოგი მას პირად შეურაცხყოფას აყენებდა და სექსუალური ძალადობით ემუქრებოდა , ზოგი კი მეტ აქტიურობასა და გაკვეთილების გაგრძელებას სთხოვდა. ამ პროცესში, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ – სოფიო კილაძემ გააკეთა განცხადება, სადაც აღნიშნა, რომ ხატია ახალაიას ცნობილმა ონლაინ გაკვეთილებმა, სამართლიანად გამოიწვია აღშფოთება საზოგადოებაში“.
რაც შემიძლია დარწმუნებით ვთქვა, არის ის, რომ სოფიო კილაძის განცხადების შემდგომ მოიმატა მუქარებმა და გამოძიება ფაქტობრივად შეჩერდა. მისი განცხადება დასტურია იმისა, რომ მთავრობა ინტრუმენტად იყენებს ძალიან სენსიტიურ საკითხს, რომელიც ბავშვებს და ჩვენს მომავალს ეხება.სამწუხაროა რომ ადამიანის უფლებათა კომიტეტს ჰყავს ასეთი თავჯდომარე, რომელიც თავად აკეთებს ადამიანის უფლებებში მომუშავე აქტივისტთა მიმართ ძალადობის წამახალისებელ განცხადებებს, თან ეს პირველი შემთხვევა არ არის მისი მხრიდან…
მიუხედავად ფსიქოლოგიური წნეხისა და გაუთავებელი მუქარისა, ხატია ახალაია დღემდე აგრძელებს პროფესიულ საქმიანობას.
ჩემი საქმიანობა ჩემი ღირებულებაა, მე ის ვარ, რასაც ვაკეთებ. მოტივაციას მაძლევენ ის მოზარდები, რომლებიც თითქმის ყოველ დღე მომმართავენ რჩევებისა თუ დახმარებისთვისთვის. ვისმენ არაერთ შემზარავ ისტორიას მოზარდთა მიმართ სექსუალურ ძალადობაზე და ამ ყველაფრის ფონზე მათ არავინ აფრთხილებს, არ აძლიერებს იმგვარად,რომ ჰქონდეთ დაცულად ცხოვრების შესაძლებლობა, რისი გარანტიაც ყოვლისმომცველი, კომპლექსური სექსუალური განათლება გახლავთ“.
ავტორი: მარიკო ნაცარიშვილი
