Facebook
2020 წლის ერთიანი ეროვნული გამოცდები დაიწყო – დამატებითი წესებითა და განსხვავებული ვალდებულებებით. პანდემიის ფონზე, აბიტურიენტებისთვის უსიამოვნო აღმოჩნდა იმის შეცნობა, რომ მათ წერა და აზროვნება პირბადეებით მოუწევდათ, ამასთან, დისტანციის დაცვითა და ტემპერატურის კონტროლით.
თუმცა, გამოცდებამდე ცნობილი გახდა, რომ წერის პროცესში მათ ექნებოდათ შესაძლებლობა, პირბადე მოეხსნათ. რამდენად კომფორტული აღმოჩნდა კონკრეტულად ეს დეტალი და როგორ ჩაიარა უშუალოდ საგამოცდო პროცესმა? ამის შესახებ „თბილისი თაიმსს“ აბიტურიენტი, საბა ურუშაძე უყვება.
„ქვეყანაში არსებული რთული პანდემიური მდგომარეობისა და დადგენილი პრევენციული რეგულაციების გამო, სხვა აბიტურიენტების მსგავსად, მეც ვფიქრობდი, რომ ძალიან რთულ გარემოში მომიწევდა ჩემი ცოდნის დამტკიცება. ნამდვილად არ იქნებოდა მარტივი 30 გრადუს სიცხეში პირბადით აზროვნება, მაგრამ ნანახმა სრუილად სხვა განცდები და შთაბეჭდილებები დამიტოვა.
სიტუაცია ბოლომდე იყო მორგებული და ორიენტირებული ბავშვების კომფორტზე და, ამავდროულად, სუფთა და ჯანსაღი გარემოს მოწყობაზე. მაქსიმალური დისტანცია აბიტურიენტებს შორის, წინ არსებული დამცავი ფარები, სადენზიფექციო ხსნარები, ოთახის მუდმივი განიავება – ეს ყველაფერი კი ნათლად წარმოგვიდგენს გამოცდის ჩატარების ხარისხს“.
შეგახსენებთ, დაავადებათა კონტროლის ეროვნული ცენტრის ცნობით, ერთიან ეროვნულ გამოცდებზე პირბადის ტარება განისაზღვრება შემდეგნაირად:
- საგამოცდო შენობაში აბიტურიენტი პირბადით უნდა შევიდეს;
- აბიტურიენტს პირბადე უნდა ეკეთოს ბილეთის აღების დროს; კომისიის წევრებთან, ზედამხედველებთან კონტაქტისას;
- აბიტურიენტებს პირბადე ერთმანეთთან კონტაქტის დროს უნდა ეკეთოთ;
- მაგიდასთან დაჯდომისას აბიტურიენტს შეეძლება პირბადის მოხსნა, მაგიდა მეორე მაგიდისგან, მინიმუმ, ორმეტრიანი დისტანციით იქნება დაშორებული;
- აბიტურიენტს უნდა ეკეთოს პირბადე, თუკი ზედამხედველს რაიმე საკითხის გასარკვევად მიმართავს;
- აბიტურიენტმა უნდა გაიკეთოს პირბადე, თუ საპირფარეშოში გავა;
- აბიტურიენტმა უნდა გაიკეთოს პირბადე, როცა წერას დაასრულებს და ზედამხედველთან მივა ნაშრომის ჩასაბარებლად.
ავტორი: მარიამ ტიელიძე
