ვინ და რატომ გასცემს დევნილებისთვის უპროცენტო სესხებს?!

საქართველოში, ასევე როგორც სხვა ქვეყნებშიც, ერთ-ერთი აქტუალური საკითხია იძულებით გადაადგილებული მოსახლეობის პრობლემების გადაჭრის გზის პოვნა. იმისათვის, რომ ასეთი კატეგორიის პირებს ჰქონდეთ შესაძლებლობა გაიუმჯობესონ სოციალური და ეკონომიკური პირობები, საქართველოში 1995 წელს  საქმევლოქმედო ჰუმანიტარული ცენტრი ,,აფხაზეთი’’ დაარსდა, რომელიც ზრუნავს სოციალურად დაუცველი მოსახლეობის გაძლიერებაზე.

თუ რა წარმოადგენს ფონდის ძირითად მიზანს, რა სახის დახმარებებს სთავაზობს ფონდი და რა პროექტების განხორციელება იგეგმება მომავალში, ამ და სხვა საკითხებზე „თბილისი თაიმსს“  ესაუბრა ცენტრ ,,აფხაზეთის’’ აღმასრულებელი დირექტორი ეკა გვალია.     

ქალბატონო ეკა, რა წარმოადგენს ფონდის დაარსების ძირითად მიზანს?

 უნდა ითქვას, რომ ფონდი – საქველმოქმედო ჰუმანიტარული ცენტრი „აფხაზეთი“ საკმაოდ დიდი ხანია რაც დაარსდა და ორგანიზაციის მთავარი მიზანია იძულებით გადაადგილებულ და სხვა სოციალურად დაუცველ პირთა სოციალური და ეკონომიკური პირობების გაუმჯობესება და მათი საზოგადოებაში ინტეგრაციის ხელშეწყობა.

საქველმოქმედო ჰუმანიტარული ცენტრი ,,აფხაზეთი’’ უპროცენტო სესხებს გასცემს მხოლოდ დევნილებზე, თუ სხვა კატეგორიის მოსახლეობაზეც ვრცელდება დახმარება?

 როგორც უკვე ავღნიშნე, ფონდის მიზანი არის სოციალურად დაუცველ პირთა დახმარება, ამიტომ საქველმოქმედო ჰუმანიტარული ცენტრი „აფხაზეთის“ უპროცენტო სესხების პროექტის ბენეფიციარები არიან აფხაზეთიდან და სამხრეთ ოსეთიდან იძულებით გადაადგილებული პირები და ადმინისტრაციულ გამყოფ ზოლთან მდებარე სოფლებში  მცხოვრები სოციალურად დაუცველი ადამიანები, რომლებსაც ბიზნეს საქმიანობის დაწყების ან განვითარების სურვილი და მაღალი მოტივაცია გააჩნიათ.

ქალბატონო ეკა, დღეის მონაცემებით რამდენმა ადამიანმა მოგმართათ დახმარებისთვის? რა სახის დახმარებებს სთავაზობთ?

 ჩვენი ფონდის დახმარების ძირითად საშუალებას წარმოადგენს უპროცენტო სესხების გაცემა. ცენტრი „აფხაზეთის“ მიერ გაცემული უპროცენტო სესხების საშუალებით საკუთარი შემოსავალი გაუჩნდა და ეკონომიკური მდგომარეობა გაიუმჯობესა 3 000-ზე მეტმა ოჯახმა. ჩვენი პროექტის ბენეფიციარებს შესაძლებლობა ეძლევათ შეიძინონ ახალი ცოდნა და უნარ-ჩვევები მცირე და საშუალო ბიზნესის მართვის საფუძვლებში, მიიღონ ბიზნესის მართვის გამოცდილება, გაზარდონ შემოსავალი და გაიუმჯობესონ სოციალური და ეკონომიკური მდგომარეობა.

ცენტრი ,,აფხაზეთი’’-ს მიერ გაცემულ სესხს აქვს კონკრეტული დანიშნულება, თუ მომხმარებელს შეუძლია გამოიყენოს თანხა საჭიროებისამებრ?

 რასაკვირველია, უპროცენტო სესხები გაიცემა ახალი ბიზნეს საქმიანობის დასაწყებად ან უკვე არსებული ბიზნესების განსავითარებლად. ბიზნეს-საქმიანობები ძირითადად ხორციელდება ვაჭრობის, მომსახურეობის, წარმოებისა და სოფლის მეურნეობის სფეროებში. ცენტრი „აფხაზეთისგან“ უპროცენტო სესხის გასაცემად მსურველებმა რამდენიმე ეტაპი უნდა გაიარონ: პირველი ეტაპია სასესხო განაცხადების მიღება, შემდეგ ხდება პოტენციურ ბენეფიციარებთან ინდივიდუალური გასაუბრება, შერჩეული კანდიდატებისათვის ბიზნესის მართვის ტრენინგების ჩატარება, ბიზნეს გეგმების შემუშავებაში მხარდაჭერა და ბენეფიციართა უპროცენტო სესხით დაფინანსება.

უპროცენტო სესხის გაცემის შემდეგ ჩვენ ვუზრუნველყოფთ ბენეფიციართა საქმიანობის სისტემატურ მონიტორინგს, გავცემთ ინდივიდუალურ კონსულტაციებს და ვაფასებთ შედეგებს. დამეთანხმებით, რომ ასეთი სახის დახმარება უფრო სარგებლის მომტანია პირებისთვის, მათი ცოდნის ამაღლებისთვის, ვიდრე უბრალოდ უპროცენტო სესხის გაცემას. ჩატარებული ტრენინგების შედეგად  ბენეფიციარს უფრო მეტი შესაძლებლობა აქვს შემდგომში სწორად მართოს ბიზნესი და ნახოს მოგება.

ქალბატონო ეკა, საქართველოს რომელ რეგიონებზე ვრცელდება ცენტრის მიერ გაწეული  საქმიანობა?

დღეს-დღეობით ჰუმანიტარული ცენტრი „აფხაზეთი’’ ბიზნესის მხარდამჭერ პროექტებს ახორციელებს  თბილისში, ქვემო ქართლში, მცხეთა-მთიანეთში, შიდა ქართლში, სამეგრელო-ზემო სვანეთსა და იმერეთში. აღნიშნულ რეგიონებში ჩვენი საქმიანობა თბილისის, გორის, ქუთაისისა და ზუგდიდის ოფისების მეშვეობით ხორციელდება.

ორგანიზაციას გააჩნია ელექტრონული მონაცემთა ბაზა, სადაც ინახება სრული ინფორმაცია ყველა რეგიონში გაცემული სესხების შესახებ. ბაზაში მოცემულია ინფორმაცია არა მხოლოდ მსესხებლების,  არამედ ყველა განმცხადებლის შესახებ. დღეისათვის ინტერნეტის გამოყენებით ბაზის საშუალებით შესაძლებელია ინფორმაციის მიღება ყველა ჩვენს ბენეფიციარზე.

,,აფხაზეთი’’-ს დაარსებამ რამდენად გამოიწვია ინტერესი ბიზნესმენებს შორის? ვინ არიან თქვენი პარტნიორები?

რა თქმა უნდა, ჩვენმა საქველმოქმედო ორგანიზაციამ საზოგადოების დიდი ინტერესი გამოიწვია საქართველოს ფარგლებს გარეთაც. ცენტრი „აფხაზეთის“ ძირითადი მხარდამჭერები არიან გაეროს სააგენტოები, ევროკავშირი, აშშ საერთაშორისო განვითარების სააგენტო და სხვადასხვა საერთაშორისო ფონდები, თუმცა ჩვენს მხარდამჭერთა რიგებში არიან აგრეთვე კერძო სექტორის წარმომადგენლები. უპროცენტო სესხების პროექტის განსახორციელებლად ჩვენს ორგანიზაციას ფინანსურ მხარდაჭერას უწევს აშშ განვითარების სააგენტოს (USAID) მიერ განხორციელებული პროექტი „ახალი ეკონომიკური შესაძლებლობები“  და ჰოლანდიის ლტოლვილთა ფონდი.

უახლოეს მომავალში იგეგმება თუ არა ახალი პროექტების განხორციელება?

მინდა ავღნიშნო, რომ ჩვენი ორგანიზაცია აუცილებლად გააგრძელებს ბიზნესის მხარდამჭერი და შემოსავლების მომტანი პროექტების განხორციელებას, ვინაიდან ამ ტიპის პროექტების საჭიროება დევნილებში ძალიან დიდია. მითუფრო, როცა სახელმწიფო ახორციელებს დევნილთა გრძელვადიან განსახლებას. მნიშვნელოვანია, რომ განსახლებას მოჰყვეს შემოსავლების  მომტანი პროექტები, რომლებიც მიმართული იქნება დევნილთა დასაქმებაზე და შემოსავლების გაზრდაზე.  აღნიშნულმა პროცესმა უფრო კომპლექსური სახე უნდა მიიღოს და მასში არასამთავრობო და დონორ ორგანიზაციებთან ერთად სახელმწიფოც ჩაერთოს.

01.11.13