რამდენიმე დღის წინ ცნობილი გახდა, რომ რუსეთისმთავრობამ წიწიბურა შიდა ბაზრისთვის აუცილებელი პროდუქტების ჩამონათვალში დაამატა და დროებით აკრძალა საზღვარგარეღთ მისი გატანა. როგორ აისახება აღნიშნული ფაქტი საქართველოზე – საკითხის შესახებ „თბილისი თაიმსს“ ეკონომიკის ექსპერტი, იოსებ არჩვაძე ესაუბრა.
„იმპორტის მხრივ, საქართველო ბევრ პროდუქტზეა დამოკიდებული. ჩვენს შიდა სასურსათო ბაზარზე იმპორტის წილი, გარკვეული პროდუქტების მიხედვით, 70 %-ს აღწევს და მეტიც არის. თითოეული პოზიციის მიხედვით, რომელზეც ჩვენ მეტად ვართ დამოკიდებული იმპორტირებულ საქონელზე, ძალზე ფრთხილი პოლიტიკა გვჭირდება და უნდა მოხდეს საგარეო ბაზრებისა და პარტნიორების დივერსიფიცირება იმისთვის, რომ არ გართულდეს მდგომარეობა და არ ვიყოთ ამა თუ იმ ქვეყნის პოლიტიკური გადაწყვეტილებების „მძევალი“, – განმარტავს არჩვაძე.
რაც შეეხება კონკრეტულად წიწიბურას იმპორტს – ექსპერტის განმარტებით, საქართველო ამ მხრივ თითქმის მთლიანად არის დამოკიდებული რუსეთზე.
„ბოლო წლებში, სამწუხაროდ, თითქმის მთლიანად ვართ დამოკიდებული რუსეთის ფედერაციაზე. თუმცა, ჩვენი შესაბამისი სტრუქტურების ხელმძღვანელები გვაიმედებენ, რომ წიწიბურას საკმარისი მარაგია იმისთვის, რომ ბაზრების გადაფორმატირების შემთხვევაში, და ეს პროცესი უკვე დაწყებულია, ჩვენ გვქონდეს შესაძლებლობა, მოსახლეობამ დაუბრკოლებლად მიიღოს ის და ბაზარზე არ იყოს პროდუქტის დეფიციტი“, – ამბობს ეკონომიკის ექსპერტი.
არჩვაძე 2010-2011 წლების პერიოდს იხსენებს, როდესაც წიწიბურაზე ფასი გასამმაგდა.
„ამა თუ იმ პერიოდში ფასების ზრდა არ ნიშნავს იმას, რომ შტორმული სიტუაცია იქნება. 2011 წელს, 2010 წელთან შედარებით, წიწიბურას ფასი შიდა ბაზარზე სამჯერ გაიზარდა. ლარ-ნახევრიდან ფასი გახდა 4.50 ლარი. მაშინდელი ფასების პერიოდში ეს საკმაოდ სოლიდური ზრდა იყო. თუმცა, ბაზარმა, მოსახლეობის მოთხოვნილების საფუძველზე, დაარეგულირა და ახლა უკვე მხოლოდ ეკონომისტებსა და სტატისტიკოსებს ახსოვთ ეს ვითარება. ასე რომ, აპოკალიფსური სურათი ნამდვილად არ უნდა წარმოვიდგინოთ.
ცხადია, სასურველია, ჩვენ გვქონდეს საკუთარი მარაგი, მაგრამ ყველაფრის შიდა წარმოებას ვერ უზრუნველვყოფთ. თუმცა, არჩეული უნდა გვქონდეს ისეთი სტრატეგიები, რომ ნებისმიერი იმპორტის გაზრდის შემთხვევაში გვქონდეს შესაბამისი პროდუქტის ექსპორტის ისეთი ღირებულება, რომელიც გადაფარავს იმპორტის ღირებულებას და ამ მხრივ თანდათან წინ მივდივართ.
თუ, მაგალითად, ექსპორტით იმპორტის გადაფარვა სადღაც 42%-ის ფარგლებშია, სასურსათო კომპონენტში ეს მაჩვენებელი უფრო მაღალია და გასულ წელს ჩვენ ექსპორტის მაჩვენებლები გაგვეზარდა, მათ შორის, ადგილობრივი წარმოებისგარეშე. ამ წელსაც, მარტის თვეში უკვე დაფიქსირდა ისტორიულად მეორე, ყველაზე დიდი მოცულობა ექსპორტისა და ეს ნიშნავს, რომ თანდათანობით ამ მიმართულებითაც მდგომარეობა დამაიმედებელი გახდება“, – განაცხადა იოსებ არჩვაძემ „თბილისი თაიმსთან“ საუბრისას.