აბორტი, ანუ ორსულობის ხელოვნური გზით შეწყვეტა, ბოლო პერიოდში სულ უფროდაუფრო აქტუალური პრობლემა ხდება, ვინაიდან საქართველოში აბორტის მსურველთა რიცხვი საგრძნობლად მატულობს.
აბორტის მიზეზები ხშირად მატერიალურ პრობლემებსა და მარტოობას უკავშირდება. ძირითადად სწორედ მარტოხელა და მიტოვებული დედები დგამენ ნაბიჯს აბორტისკენ, ანუ იმ მოქმედებისკენ, რომელიც ქრისტიანულ სარწმუნოებაში უდიდეს ცოდვადაა მიჩნეული.
როგორც უკვე აღვნიშნეთ, მართლმადიდებლობაში აბორტი უმძიმეს ცოდვად არის მიჩნეული. ამაზე ერთხმად თანხმდებიან სასულიერო პირები და მრევლი. მამა კონსტანტინე გიორგაძე „კარიბჭესთან“ ინტერვიუში დეტალურად საუბრობს აბორტსა და ქრისტიანობაზე.
„მუცლადმყოფი ნაყოფის მოშორება გაცილებით მძიმე ცოდვაა, ვიდრე ხილული სახით კაცის კვლა – ზრდასრულ ადამიანს თავის დაცვა მაინც შეუძლია.“ – აცხადებს მამა კონსტანტინე გიორგაძე.
სასულიერო პირის თქმით, დაუშვებელია მუცლადმყოფი ნაყოფის მოკვლა ფიზიკური ნაკლისა თუ სხვადასხვა მიზეზის გამო. ინტერვიუში საუბრისას, მამა კონსტანტინე ექიმების საქმიანობასაც ეხება და ამბობს, რომ ექიმიც ისევე სცოდავს, როგორც დედა –
„დედა არის მოსამართლე, ხოლო ექიმი ჯალათი, რომელიც დედის უკეთურ ნებას აღასრულებს“
აღსანიშნავია ის ფაქტიც, რომ მართლმადიდებლობაში ცოდვილად ითვლება ისიც, ვინც აბორტის პროცესს ხელს შეუწყობს. სასულიერო პირები აცხადებენ, რომ თუკი დედას ვინმე გაჰყვება აბორტის გასაკეთებლად, ისიც ცოდვილი და დამნაშავეა, ვინაიდან ეს ცოდვის წახალისება და ხელშეწყობა გამოდის.
სასულიერო პირთან საუბარში ირკვევა, რომ ცოდვას წარმოადგენს ჩასახვის საწინააღმდეგო აბებიც, რომელიც რეალურად ხელს უშლის ნაყოფის ჩასახვას, ანუ კიდევ ერთი სიცოცხლის მოვლენას დედამიწაზე.
მასალა მოამზადა: თორნიკე ყრუაშვილმა
წყარო: www. Karibche.ambebi.ge
