რა შეგრძნებაა, როდესაც გვაქვს შესაძლებლობა, წამი შევაჩეროთ და ის მარადისობად ვაქციოთ? საერთოდ, არის ეს რეალური მოცემულობა? ამის საშუალება ნამდვილად არსებობს – „ასლი“-ს ჯადოსნური ყუთის მეშვეობით. რას მოიცავს ეს ყუთი და როგორ გვაგრძნობინებს ის თავს ნამდვილ მოქანდაკედ? „თბილისი თაიმსს“ ნინო კოპალიანი ესაუბრა.
იდეა ძალიან საინტერესოა – როგორ გაჩნდა ის?
უშუალოდ ხელების ქანდაკების წარმოდგენილი ტექნიკით დამზადების იდეას, სამწუხაროდ, საკუთარ თავს ვერ მივაწერ. აღნიშნული ბიზნესი ბევრ ქვეყანაში მინახავს. პირველად კი აშშ-ში ვიხილე. მაშინ იქ სკოლაში ვსწავლობდი და ხელოვნების გაკვეთილზე პედაგოგმა დაგვავალა საინტერესო პროდუქტის შექმნა. ერთ-ერთმა მოსწავლემ ჩვენ თვალწინ დაამზადა ქანდაკება, რამაც ყველა ძალიან მოგვხიბლა და გამარჯვებულიც ის გახდა. მაშინ გამიჩნდა იდეა საქართველოში მსგავსი პროდუქტის წარმოების, რომელსაც ფრთები სულ ახლახან შევასხი კომპანია „ასლი“-ს დაარსებით.
დეტალურად, რას გულისხმობს „ასლი“?
„ასლი“ ქართული და ევროპული პროდუქტების ნაზავია. ჩვენი პროდუქტით შესაძლებლობა გეძლევათ, ქანდაკება შექმნათ სახლის პირობებში საკუთარი ხელებით. ყველაზე მოთხოვნადი და მარტივად შესაქმნელი ხელის ქანდაკებაა, რომელიც უძვირფასესი სუვენირი შეიძლება, გახდეს შემქმნელისთვის.
კომპანიას მინდოდა, ქართული სახელწოდება ჰქონოდა, რომელიც ასახავდა პროდუქტის არსს. ასევე, ქანდაკებების თემატიკა ჩემთვის ძველ საბერძნეთთან ასოცირდება. შესაბამისად, ლოგოდ აფროდიტეს ყვავილი და ბერძნული ორნამენტები ავარჩიე.
ტექნიკურად, ეს რა პროცესია?
„ასლი“ ნაკრების სახით იყიდება, რომელიც რამდენიმე პროდუქტს მოიცავს (ყველაფერს, რაც ქანდაკების დასამზადებლადაა საჭირო).
1 – ყალიბის მომზადება.
ყალიბი მზადდება იტალიური წარმოების სამედიცინო პროდუქტით, რომელიც ანტიალერგიულია და სრულიად უვნებელი კანისთვის. ძალიან სწრაფად შრება ნარევი, შესაბამისად, ბავშვებისთვისაც ძალიან სახალისოა, რადგან არ იღლებიან პროცესით.
2 – ქანდაკების მომზადება.
უშუალოდ ქანდაკება მზადდება თაბაშირით. აღნიშნულ პროდუქტსაც უვნებლობის სერტიფიკაცი აქვს მიღებული.
ქანდაკებას ასევე მოყვება:
• ინსტრუქცია ქართულ და ინგლისურ ენებზე;
• ჭურჭელი, რომელშიც უნდა მომზადდეს ქანდაკება;
• ხელთათმანი ფხვნილების წყალში ასარევად;
• ხის წკირი ყალიბის ნარჩენებისგან ქანდაკების გასასუფთავებლად.
ბევრია დაინტერესებული თქვენი პროდუქტით?
არ ველოდით ასეთ გამოხმაურებას. ჩვენი მომხმარებლები არიან წყვილები, რომლებსაც სურთ, თავიანთი სიყვარულის ხელშესახები ვერსია შექმნან და სამუდამოდ შეინახონ იგი, ასევე, ჩვენს მომხმარებელთა რიგს მიეკუთვნებიან ბავშვები, მოხუცები და ოჯახები, რომლებიც ერთ ჩვეულებრივ დღეს სამუდამოდ დასამახსოვრებელს ხდიან.
მომხმარებლებისთვის გვაქვს ასევე ვიდეოინსტრუქცია, რომელიც დეტალურად განმარტავს ქანდაკების მომზადების წესს.
მომავალში ვგეგმავთ კიდევ უფრო გაფართოებას როგორც პროდუქტების ნაირსახეობის, ასევე, ბაზრის დივერსიფიკაციის კუთხით.
მასალა მოამზადა : მარიამ ტიელიძემ