ავტო საგზაო შემთხვევებზე, პატრულის ეთიკის კოდექსა და საპატრულო პოლიციაში მოსალოდნელ რეფორმებზე ”თბილისი თაიმსს“ საპატრულო პოლიციის დეპარტამენტის დირექტორი დავით ცინარიძე ესაუბრა.
მედიასაშუალებები ძალიან ხშირად აშუქებენ, ავტო საგზაო შემთხვევების ფაქტებს, ყველაზე ხშირად რა ხდება ავტოკატატროფის მიზეზი და რა რჩევას მისცემდით მძღოლებს?
ყველაზე ხშირად ავტოსაგზაო შემთხვევების გამომწვევი მიზეზი მძღოლის დაუდევრობაა. ავარიების მიზეზად ასევე შეიძლება დავასახელოთ გადაჭარბებული სიჩქარე და მძღოლის მიერ ავტომანქანის არაფხიზელ მდგომარეობაში მართვა. დაუდევრობაში კი იგულისმხება მძღოლის მიერ საგზაო მოძრაობის წესების იგნორირება. მინდა, ვურჩიო მძღოლებს აუცილებლად დაიცვან მოძრაობის წესები, რათა თავიდან აიცილონ ავტოსაგზაო შემთხვევბი.
რამდენიმე თვის წინ ცვლილებები შევიდა პატრულის უნიფორმაში, რამდენად ეფექტურია ფორმაზე დამონტაჟებული კამერა და რა შედეგი გამოიღო?
დიახ, გასულ წელს საპატრულო პოლიციის სრული რებრენდინგი განხორციელდა, რომლის ფარგლებშიც მთლიანად შეიცვალა ფორმის ტანსაცმელი. პატრულ-ინსპექტორის აღჭურვილობას დაემატა სამხრე ვიდეოკამერა. სამხრე ვიდეოკამერა შემთხვევის ადგილზე რეალური სურათის დაფიქსირების შესაძლებლობას იძლევა. მოქალაქესთან კონტაქტისას ვიდეოკამერით იწერება ორივე მხარის მიერ ქმედებები, რომელთა შემდგომი გაანალიზების შედეგად ადვილია ჭეშმარიტების დადგენა, იყო თუ არა პატრულს ქმედებაში გადაცდენა, ან იყო თუ არა მოქალაქე კანონთან მიმართებაში მართალი. ვიდეოკამერების ამოქმედების შემდეგ დაახლოებით 10-ჯერ შემცირდა გასაჩივრებული ჯარიმების რაოდენობა.
რა კრიტერიუმებს უნდა აკმაყოფილებდეს პიროვნება, რომ გახდეს პატრული?
საპატერულო პოლიციაში მიღების წესი არ განსხვავდება შსს-ს ნებისმიერ სამსახურში მიღების წესისგან. ანუ კანდიდატს უნდა ჰქონდეს შესაბამისი განათლება, უნდა იყოს ფიზიკურად ჯანმრთელი და რაც მთავარია, შსს-ს აკადემიაში უნდა გავლილი ჰქონდეს შესაბამისი სასწავლო კურსი.
პოლიციელის ეთიკის კოდექსზეც მინდა გკითხოთ, რას ითვალისწინებს ეს პრინციპები და როგორ უნდა მოიქცეს პატრული რიგით ადამიანთან მიმართებაში?
საპატრულო პოლიციის თანამშრომელს გააჩნია შესაბამისი კანონით მინიჭებული უფლება-მოვალეობები, რომელებითაც ხელმძღვანელობს ის მოქალაქესთან ურთიერთობისას. აღნიშნული კანონი მოიცავს როგორც პატრულის უფლებებს, ისე ემსახურება მოქალაქის უფლებების დაცვას.
ხომ არ იგეგმება ახლო მომავალში რაიმე რეფორმა საპატრულო პოლიციაში?
საპატრულო პოლიციის მუშაობის საქმიანობა, მუშაობის მეთოდები და სტრუქტურა მუდმივად განახლების პროცესს ექვემდებარება. სიახლეები ხორციელდება იმის მიხედვით, თუ რა სახის ცვლილებებს მოითხოვს ჩვენგან დღევანდელობა, რა სახის რისკების წინაშეც ვდგავართ, როგორ შეიძლება გავაუმჯობესოთ და უფრო ეფექტიანი გავხადოთ საპატრულო პოლიციის მუშაობა.
12.06.14
ნინა პირტახია
