ქართველებისათვის ყველაზე ოდიოზური და პოპულარული, NDI-ის ქართული ოფისის შეფი ლუის ნავარო ორი დღის წინ მართლმადიდებლად მოინათლა. geotimes.ge შეეცადა, ნავაროსგან პირადად მოესმინა ამ ამბის დეტალები, მაგრამ საარჩევნო ციებ-ცხელების კვირაში მასთან დაკავშირება შეუძლებელი გახდა. ამბავი კი ასეთია:
გუშინ თბილისის ქვემო ბეთლემის ეკლესიაში დილის წირვაზე მისულ მრევლს მამა ალექსანდრემ ქადაგების ბოლოს უწმინდესისა და უნეტარესის შეგონება შეახსენა და თქვა, რომ ძალიან ძნელია პრობლემებით სავსე ქვეყანაში ცხოვრება, მაგრამ ქართველებმა მაინც უნდა შევძლოთ საკუთარ სამშობლოში დარჩენა და ამ პრობლემებთან გამკლავება. მით უფრო მაშინ, როცა უცხო ქვეყნიდან დროებით ჩამოსული ადამიანები აქ ისეთ სულიერ გარემოს პოულობენ, უკან დაბრუნება აღარ უნდათ. მამა ალექსანდრემ ლუის ნავაროს მაგალითი დაასახელა და თქვა, რომ წინა დღეს ეკლესიაში მოულოდნელად მივიდა ქართველებისათვის კარგად ნაცნობი პერსონა და მართმადიდებლად მონათვლა ითხოვა.
„მართალი გითხრათ, გავოცდი, მაგრამ როცა ამ ადამიანის აღსარებასავით ნათქვამი მოვისმინე, ცრემლი მომადგა, – თქვა მამა ალექსანდრემ, – ნავარომ მითხრა, ბევრ ქვეყანაში ვყოფილვარ, მიცხოვრია, მაგრამ ისეთი ტკბილი, თბილი და ზნეობრივი ხალხი, როგორიც საქართველოში ცხოვრობს, არსად მინახავსო. დიდხანს ვეძებდი მიზეზს და მივხვდი, რომ ეს ყველაფერი თქვენი რწმენიდან მოდისო. ისიც გაგვიმხილა, რომ საბოლოოდ აქ დარჩენას აპირებს და იხუმრა, აქ დამმარხეთო“.
ლუის ნავარო შაბათს ბეთლემის მამებმა მართლმადიდებლად მონათლეს. იგი ამერიკის მოქალაქეა, წარმოშობით პერუდან და როგორც თვითონ უთქვამს, არც ერთი რწმენის მიმდევარი არ ყოფილა.
წყარო: geotimes.ge
18.06.14
