დედაქალაქის მუნიციპალიტეტის საკრებულოს თავმჯდომარე გიორგი ალიბეგაშვილი სასტუმრო „ქორთიარდ მარიოტში“ რელიგიის საკითხთა სახელმწიფო სააგენტოს მიერ 2014 წელს გაწეული საქმიანობისა და საქართველოს სახელმწიფოს რელიგიური პოლიტიკის განვითარების სტრატეგიის პრეზენტაციას დაესწრო. რელიგიის საკითხთა სახელმწიფო სააგენტოს ხელმძღვანელმა ზაზა ვაშაყმაძემ სტუმრებს გასული წლის საქმიანობის ანგარიში წარუდგინა და სააგენტოს სამომავლო გეგმებზე ისაუბრა. როგორც გიორგი ალიბეგაშვილმა აღნიშნა, ქართულ სახელმწიფოს რელიგიათშორისი ურთიერთობების მხრივ დიდი გამოცდილება აქვს, თუმცა თანამედროვე მოთხოვნების გათვალისწინებით ბევრი რამის გამოყოფა აქცენტირებაა აუცილებელი. „აღნიშნული ანგარიშიდან გამომდინარე გამოიკვეთა ის ძირითადი პრიორიტეტები, რომელიც ჩვენმა სახელმწიფომ უნდა წარმართოს. მასში ძალიან მნიშვნელოვანია ქალაქის მუნიციპალიტეტის მონაწილეობა, ამის ერთ-ერთი ნათელი მაგალითია ტოლერანტობის სკვერის გახსნა, რომელიც შეგვახსენებს, რომ რელიგიური ურთიერთობები მთავარია კულტურულ ურთიერთობებთა ხარისხში იყოს აყვანილი, რაც საშუალებას მოგვცემს სწორი პოლიტიკა შევიმუშავოთ სხვადასხვა რელიგიური ეროვნების წარმომადგენლებთან ურთიერთობებისას. თბილისის მერია და საკრებულო მოწოდებულია ამ კუთხით კიდევ უფრო გააქტიუროს თავისი მუშაობა“,-განაცხადა გიორგი ალიბეგაშვილმა. რელიგიის საკითხთა სახელმწიფო სააგენტო საქართველოს მთავრობის გადაწყვეტილებით 2014 წლის მაისში შეიქმნა და მისი მიზანია, განვითარებული დასავლური სახელმწიფოს გამოცდილებათა გაზიარებით, ხელი შეუწყოს ქვეყანაში სწორი რელიგიური პოლიტიკის განხორციელებას. ღონისძიებას საქართველოში არსებული რელიგიური ორგანიზაციები, დიპლომატიური კორპუსისა და საქართველოს მთავრობის წარმომადგენლები ესწრებოდნენ.
