„ახალგაზრდა ფინანსისტთა და ბიზნესმენთა ასოციაცია – აფბას“ შეფასებით, ეროვნული ბანკის ქმედებები ლარის დევავაციის მასშტაბის არაადეკვატურია.
,,აფბას“ პრეზიდენტმა ნოდარ ჭიჭინაძემ ბრიფინგზე განაცხადა, რომ : ,,დოლართან მიმართებაში ლარის კურსის ვარდნა რამდენიმე თვეა მიმდინარეობს, თუმცა ბოლო ერთი კვირის განმავლობაში განვითარებული პროცესები აჟიოტაჟის და პანიკის აშკარა ნიშნებს შეიცავს. „აფბას“ შეფასებით, ეროვნულმა ბანკმა არათუ მკვეთრი რყევებისგან ვერ დაიცვა საზოგადოება, არამედ იმ დონის ჩარევაც ვერ განახორციელა, რომელიც ბაზარზე აჟიოტჟს არ გამოიწვევდა.
ბოლო 3 თვეში ლარი 30%-ით გაუფასურდა, თუმცა ეროვნული ბანკის ქმედებები ერთხელაც არ ყოფილა პრევენციული, მკვეთრი რყევის გამანეიტრალებელი და სებ-მა სიმბოლური ჩარევა მხოლოდ მას შემდეგ დაიწყო, რაც ბაზარზე აჟიოტაჟურმა და პანიკურმა განწყობილებამ პიკს მიაღწია. „აფბას“ შეფასებით, ასეთ ვითარებაში, სებ-ის 40 მილიონ დოლარიანი ინტერვენციები მისი მხრიდან პასუხისმგებლობის მოხსნის მცდეობა უფროა, ვიდრე დევალვაციის პროცესის შეჩერების მიზნით გადადგმული რეალური ნაბიჯი.
ახალგაზრდა ფინანსისტები მივიჩნევთ, რომ სებ-მა 200 მილიონი დოლარის სავალუტო რეზერვი არაეფექტიანად გამოიყენა. დევალვაციის ასეთ მასშტაბს გაცილებით დიდი მოცულობის ინტერვენცია სჭირდებოდა, თან მანამდე, ვიდრე სიტუაცია პანიკაში და აჟიოტაჟში გადაიზრდებოდა. უკონტროლო სიტუაციის შემობრუნება გაცილებით რთულია და გაცილებით მეტი რესურსის დახარჯვას მოითხოვს.
ყოვლად გაუგებარია, რას უკავშირდებოდა ეროვნული ბანკის პასიურ პოზიციაში ყოფნა და სავალუტო ინტერვენციების დაწყება აჟიოტაჟის ვითარებაში, რის გამოც სებ-ის მიერ აუქციონზე გამოტანილი რესურსის უკვალოდ შთანთქმა მოხდა, და არა მაშინ, როდესაც ლარის დევალვაციის პროცესი საწყის სტადიაზე იყო და ბაზარზეც გაცილებით მეტი სიმშვიდე იყო.
ასევე კითხვებს ბადებს კიდევ ერთი გარემოება. ბოლო წლებში და მათ შორის 2013-2014 წლებში ეროვნულმა ბანკმა სავალუტო აუქციონებიდან უფრო მეტი დოლარი ამოიღო, ვიდრე გაყიდა, უფრო კონკრეტულად, 2013-2014 ეროვნულ ბანკს ნაყიდი (ამოღებული) ქონდა 775 მილიონი დოლარი და გაყიდული (დაბრუებული) 540 მილიონი დოლარი, ანუ 235 მილიონი დოლარი. „აფბას“ შეფასებით დოლარის მასის ამოღების ზრდის ფონზე, საჭირო მომენტში ინტერვენციების განხორციელებისგან თავის შეკავება იყო ეროვნული ბანკის შეცდომა, ხოლო ამაზე დიდი შეცდომა კი რეზერვების დაგვიანებული ხარჯვა აღმოჩნდა.
ამდენად, ახალგაზრდა ფინანსისტები მივიჩნევთ, რომ სებ-ის მიერ გადადგმული ნაბიჯები არის დაგვიანებული და არაეფექტიანი. ეროვნულმა ბანკმა ვერ აღკვეთა პანიკური განწყობილების ფორმირება და ბაზარზე აჟიოტაჟური ქმედებები, შესაბამისად, სებ-ის ინტერვენციები ტოვებს სიმბულურობის და პასუხისმგებლობის არიდების შთაბეჭდილებას.
