საგადასახადო კოდექსში შეტანილი ცვლილებების შედეგად, 20 ათასზე მეტ გადასახადის გადამხდელს საგადასახადო დავალიანების გადახდა აღარ მოუწევს და ბიზნესსაქმიანობის სუფთა ფურცლიდან დაწყების შესაძლებლობა მიეცემა.
იაფი ფულის დეფიციტი ქვეყნის ეკონომიურ განვითარებას საგრძნობლად აფერხებს. კრედიტის აღება და ახალი ბიზნესის დაწყება საქართველოში შეუძლებელია, თუ თქვენ უკვე არ ეწევით გარკვეულ ბიზნესსაქმიანობას. ეს იმას ნიშნავს რომ სტატრტაპების დაფინანსება ჩვენთან გულისხმობს არა ახალი ინიციატივიანი ადამიანების შემოყვანას ეკონომიკურ სივრცეში, არამედ კომპანიის პროფილურ გაფართოებას.
შეიძლება ეს მიდგომა ერთი შეხედვით ადვილად გასაგები იყოს: პირველი-ბანკები არ მიდიან რისკზე (თუმცა საინტერესო ბიზნესპროექტის შემთხვევაში, ბანკს შეუძლია თვითონ მიამაგროს მენეჯერი პროექტს ანუ დამწყებ ბიზნესმენს ადამიანური რესურსითაც დაეხმაროს საქმის წარმოებაში) და მეორე სახელმწიფოს არ აქვს საშუალება ხელი შეუწყოს-საკუთარი საქმის დაწყების მსურველ მოქალაქეს. სწორედ ეს მეორე (სახელმწიფოს არ აქვს საშუალება) შეიძლება იქნას დაძლეული, ხელისუფლების მხრიდან გარკვეულ ლავირების შემთხვევაში. როგორ ხდება დავლიანების ჩამოწერა:
„საქართველოს ფინანსთა სამინისტროს ინიციატივით საგადასახადო კოდექსში განხორციელებული ცვლილებების შედეგად (2014 წლის 12 დეკემბრის N 2946 საქართველოს კანონი), საგადასახადო კოდექსის 309-ე მუხლის 37-ე ნაწილი ჩამოყალიბდა ახალი რედაქციით, რომლის შესაბამისად ჩამოწერას დაექვემდებარა: ა) 2005 წლის 1 იანვრამდე წარმოშობილი და ამ ქვეპუნქტის ამოქმედებამდე გადაუხდელი საგადასახადო დავალიანების თანხა, თუ პირს თანხის ჩამოწერამდე აქტივობები არ უფიქსირდება; ბ) 2009 წლის 1 იანვრამდე წარმოშობილ აღიარებულ საგადასახადო დავალიანებაზე დარიცხული საურავი და 2009 წლის 1 იანვრამდე დარიცხული აღიარებული ჯარიმა, აღიარებული გადასახადის თანხის გადახდის პირობით, თუ პირს თანხის ჩამოწერამდე აქტივობები არ უფიქსირდება; გ) საკონტროლო სალარო აპარატის გამოყენების წესების დარღვევისათვის ფიზიკური პირისათვის 2013 წლის 1 იანვრამდე დაკისრებული/დარიცხული და ამ ნორმის ამოქმედებამდე გადაუხდელი ჯარიმა. წინასწარი გაანგარიშებით, ჩამოსაწერი თანხა დაახლოებით 1 მილიარდ ლარს შეადგენს“.
ამ ცვლილებების ფონზე მინდა ავხსნა რას ვგულისხმობ ხელისუფლების მხრიდან გარკვეულ ლავირებაში. როდესაც ჩამოსაწერი თანხა შეადგენს დაახლოებით 1 მილიარდ ლარს, თუ ხელისუფლება ჩადებდა პირობას დავალიანების ჩამოწერის მექანიზმში, რომ კომპანიები რომლებსაც აღარ მოუწევდათ ჯარიმის გადახდა, ვალდებულებას აიღებდნენ რომ, 5 წლის განმავლობაში ჩამოწერილი თანხის 10 %-ს მოახმარდნენ, სტარტაპების დაფინანსებას 2 % ნამატის ფარგლებში, მივიღებდით 100 მილიონ იაფ ფულს. 100 მილიონი ლარი 2% კრედიტი ხელს შეუწყობდა მრავალი ახლი ბიზნესპროექტის განხორციელებას და ახალი ინიციატივიანი ადამიანების შემოყვანას ეკონომიკურ სივრცეში. ეს იაფი ფულის დეფიციტის აღმოფხვრის ერთი პირობითი ინსტრუმენტია…
მალხაზ ხაზარბეგიშვილი
