ჯანდაცვის მინისტრი დავით სერგეენკო დღეს იმ დამსაქმებლებს შეხვდება, ვინც სამინისტროს მიერ ორგანიზებულ დასაქმების კვირეულში არიან ჩართულები.
როგორც ჯანდაცვის სამინისტროში განმარტავენ, შეხვედრის მთავარ მიზანს წარმოადგენს შრომის ბაზარზე არსებული მდგომარეობის უშუალოდ დამსაქმებლებისგან მოსმენა და მხარეებს შორის შემდგომი თანამშრომლობის გაღვივება.
“სამუშაო ადგილები ძირითადად კერძო სექტორში იქმნება ამდენად უმუშევრობის შემცირებისათვის ძალიან მნიშვნელოვანია კერძო სექტორის წარმომადგენლებთან თანამშრომლობა.
დღეს ქვეყანაში შრომის ბაზარზე გვაქვს მოთხოვნა-მიწოდებას შორის მკვეთრად გამოხატული დისბალანსი. დისბალანსის მიზეზები მრავალფეროვანია: კვალიფიციური კადრის ნაკლებობა, რეგიონალური განვითარების პოლარიზაცია, დამსაქმებელთა მოთხოვნების შესახებ ინფორმაციის ნაკლებობა, შრომის ფასი და სხვ. დისბალანსის შემცირების ერთ-ერთი უმნიშვნელოვანესი კომპონენტი არის შრომის ბაზრის რეგულარული კვლევები.
2015 წელს პირველად ჩატარდა შრომის ბაზრის მოთხოვნის კომპონენტის თვისებრივი და რაოდენობრივი კვლევები. თვისებრივი 240 კომპანიაში, რაოდენობრივი 6000 კომპანიაში. სოციალური მომსახურების სააგენტო გააგრძელებს კვარტალურ თვისებრივ კვლევეს 250 კომპანიაში რეგულარულად. ამ კვლევების მთავარი მიზანი იქნება რეგიონში მოთხოვნადი პროფესიების და ამ პროფესიებისათვის საჭირო ცოდნისა და უნარების გამოვლენა. აღნიშნული კვლევის საფუძელზე დაიგეგმება და დადგინდება სამუშაოს მაძიებელთა პროფესიული მომზადება-გადამზადების საჭიროება და პროფესიები. რაოდენობრივი კვლევის შედეგად გამოვლინდება შრომის ბაზრის მოთხოვნის კომპონენტის ძირითადი ტენდენციები და მოხდება მოთხოვნების პროგნოზირება”,- აცხადებენ სამინისტროში.
დასაქმების კვირეული 22-დან 24 სექტემბრის ჩათვლით, ჯანდაცვის სამინისტროს ეროვნულ სასწავლო ცენტრში გაიმართება. სხვადასხვა კომპანიის წარმომადგენლები ადგილზე შეარჩევენ მათთვის სასურველ კადრებს.
ცნობისთვის, დასაქმების კვირეულში 60-მდე კომპანია მონაწილეობს. დამსაქმებლებმა 255 პოზიციაზე, 610 ვაკანსია წარმოადგინეს.
