საკრებულომ თბილისის 2016 წლის ბიუჯეტის პროექტი დაამტკიცა. ბიუჯეტს 32 დეპუტატმა მისცა ხმა, 10 წინააღმდეგი იყო, ერთმა – თავი შეიკავა. საკრებულოს სხდომა გუშინ რამდენიმე საათის განმავლობაში ხმაურით მიმდინარეობდა. ოპოზიციამ დავით ნარმანია და ბიუჯეტის პროექტი გააკრიტიკა. თბილისის 2016 წლის ბიუჯეტი 815 მილიონ 900 ათასი ლარია. აღნიშნული თანხიდან ჯანდაცვისა და სოციალური უზრუნველყოფის პროგრამებზე 214 მილიონ ლარზე მეტი დაიხარჯება, სატრანსპორტო ინფრასტრუქტურის ობიექტების მშენებლობა-აღდგენით სამუშაოებზე – 103 მილიონი ლარი, ინფრასტრუქტურის განვითარებაზე – 271 მილიონი ლარი, განათლების პროგრამებზე- 95,100 მლნ ლარი. დედაქალაქის მერის განცხადებით, 1,5 მილიონი ლარით მცირდება თბილისის მერიისა და გამგეობის ადმინისტრაციების ხარჯები, ასევე მცირდება სამივლინებო, ტრანსპორტისა და სატელეფონო ხარჯები. ეკოლოგიური და გამწვანების პროგრამებისათვის გათვალისწინებულია 68 მლნ ლარი და ა. შ. თბილისის საკრებულოში მერიიდან 2016 წლის ბიუჯეტის პროექტის შესწორებები 10 დეკემბერს შევიდა. საკრებულოში ბიუჯეტის პროექტის დამტკიცებას თბილისის მთავრობის წევრები ესწრებოდნენ.