ქართველი ჟურნალისტები, მედიატურის ფარგლებში, ირანის უმსხვილეს ტრაქტორების ქარხანას ( ITM CO ) ესტუმრნენ. როგორც ქარხნის პიარისა და საერთაშორისო ურთიერთობების ხელმძღვანელმა – არაშ მალიქმა განაცხადა, ფაბრიკა 50 წელია რაც არსებობს და, ჰოლდინგის ფორმატში, 16 ტიპის ტრაქტორს აწარმოებს. ტრაქტორების სიმძლაერე 36 ცხენისძალიდან იწყება და 150-მდე მერყეობს.
მოწოდებული ინფორმაციით, თავიდან ფაბრიკამ წარმოება რუმინეთიდან ჩამოტანილი სხვადასხვა ნაწილით დაიწყო, დღეს კი აბსოლუტურად საკუთარ წარმოებაზეა გადასული.
ირანული ტრაქტორების ქარხანა არა მარტო ირანში, არამედ ტაჯიკეთსა და ვენესუელაშიცაა. წარმოებული ტრაქტორების 70% ადგილობრივ ბაზარზე იყიდება, დანარჩენი კი – ავღანეთში, სუდანში, ერაყსა და ლათინური ამერიკის ქვეყნებში ნაწილდება.
როგორც კომპანიის მენეჯერი ამბობს, მათი ტრაქტორების უპირატესობა ისაა, რომ ფასები დაბალია, ხარისხი კი – ძალიან მაღალი.
,,მსოფლიოს 5 ქვეყანას აქვს მხოლოდ იმის უნარი, რომ მსგავსი სიმძლავრის ტრაქტორები დაამზადოს. ფასები კი მათთან შედარებით ძალიან დაბალი გვაქვს – ყველაზე მეტი ცხენისძალიანი ტრაქტორის ღირებულება 20 000 დოლარია, როდესაც სხვა ქვეყნებში მათი ფასი ბევრად უფრო მაღალია.“
ფაბრიკაში დღეში 200-მდე ტრაქტორი მზადდება, წელიწადში კი, დაახლოებით -25 000.
კომპანიაში დასაქმებულია 5 000-მდე ადამიანი და ხელფასები მინიმუმ 800 დოლარიდან იწყება. ქართველი ჟურნალისტები დაინტერესდნენ იმით, თუ აპირებს ფაბრიკა საქართველოსთან ურთიერთობას და თუ არის შემუშავებული სავაჭრო ურთიერთობის გეგმა.
როგორც არაშ მალიქმა აღნიშნა, მათ დიდი სურვილი აქვთ საქართველოსთან ურთიერთობის და მოლაპარაკებების დაწყებასაც გეგმავენ.
,,როგორც ვიცით, თქვენს ქვეყანაში ტრაქტორების უმეტესობა ბელორუსიდან შემოდის. ჩვენ საქართველოს ბევრად უფრო მაღალ ხარისხსა და დაბალ ფასებს ვპირდებით“ – აღნიშნა ქარხნის პიარისა და საერთაშორისო ურთიერთობების ხელმძღვანელმა.
ნატალია ჯალაღონია