საქართველოში მცხოვრები მუსლიმი სტუდენტები 3 აპრილს დაგეგმილი აქციის საწინააღმდეგო განცხადებას ავრცელებენ.
საქართველოში 3 აპრილს ისლამის საწინააღმდეგო აქციის გამართვის თაობაზე უკვე რამდენიმე დღეა, რაც სოციალურ ქსელებში მოწოდებები ვრცელდება. ამ ფაქტთან დაკავშირებით, აზერბაიჯანელ-მუსლიმი სტუდენტების ერთი ჯგუფი საქართველოს სახელმწიფოსა და მთავრობის ხელმძღვანელებს, ასევე საზოგადოებას მიმართავს. მიმართვაში ნათქვამია:
,,ძვირფასო და პატივცემულო თანამემამულენო! აღვნიშნავთ, რომ ჩვენ ჩვენ, აზერბაიჯანელი-მუსლიმი სტუდენტები, საქართველოს სრულუფლებიანი და სახელმწიფოებრივი ტრადიციების მოერთგულე მოქალაქეები ვართ. ჩვენი წინაპრები ისტორიულად ერთმანეთთან მეგობრულ, ძმურ და გულწრფელ ურთიერთობებს აყალიბებდნენ. ისინი ნიადაგ ერთმანეთის რწმენის, ადათ-წესების მიმართ პატივისცემასა და ტოლერანტულ დამოკიდებულებას იჩენდნენ. თუმცა როგორც ჩანს, ამ ტრადიციის მოწინააღმდეგე დივერსიულ ძალთა გარკვეული ჯგუფი არასასურველი აქციების ჩატარებით ქვეყანაში სტაბილურობის დარღვევას, ტოლერანტული გარემოს შეცვლასა და ხალხების ურთიერთწაკიდებას ისახავს მიზნად. ჩანს, რომ ცრუპატრიოტიზმით გულანთებულებს, ამ საქციელის შედეგები კარგად ვერ გაუაზრებიათ ან მათ მიზანს იმთავითვე დესტაბილიზაცია წარმოადგენს. იმის ნაცვლად, რომ მსოფლიოში რელიგიის სახელით უამრავი ტერორისტული, ექსტრემისტული დაჯგუფების არაადამიანური ქმედებები დაგმონ, მშვიდობისა და კეთილგანწყობის მქადაგებელი ისლამის საწინააღმდეგო აქციის გამართვა განუზრახავთ. ჩვენ ვგმობთ ამ აქციას და ჩვენი სახელმწიფოს სამართალდამცავი ორგანოებისაგან მის დროულად აღვეთას მოვითხოვთ. ჩვენ ასევე მოვიწოდებთ ჩვენს ხალხს -გნებავთ მის მორწმუნე გნებავთ სხვა შეხედულების მქონე ნაწილს, განსაკუთრებით კი ახალგაზრდობას, რომ ასეთი პროვოკაციების წინაშე სიფრთხილე გამოჩინონ. პატივისცემით საქართველოს მუსლიმ სტუდენტთა ჯგუფი.”- წერია მიმართვაში.
რაც შეეხება დაგეგმილ აქციას, სახელით ,,ანტისაიმიგარციო, ანტიისლამისტური აქცია-მსვლელობა”, მიმართვის ტექსტში წერია:
,,სპეციალურად გაუნათლებლებისთვის და პროვოკატორებისთვის: ისლამიზმი არის პოლიტიკურ-რელიგიური მოძრაობა, რომელიც ირანის ან საუდის არაბეთის ანალოგიურ სახელმწიფოს შექმნას გულისხმობს ან ისლამური სახელმწიფოს მსგავსი ტერორისტული ორგანიზაციების წახალისებას. საქართველოში კი ამის უამრავი მომხრეა და თან არც კი მალავენ, საქართველოს უამრავი მოქალაქე იბრძვის ისლამური სახელმწიფოს რიგებში ამის წინააღმდეგ კი სახელმწიფო თითქმის არაფერს აკეთებს. კიდევ ერთი მიზეზი თუ რატომ უნდა გამოხვიდეთ 3 აპრილს.”
ნატალია ჯალაღონია