,,აუდიტორია #115″: ,,არა პოლიციურ რეჟიმს!”

,,აუდიტორია #115-ის” სტუდენტები მორიგ აქციას გეგმავენ, ამჯერად, ლოზუნგით: ,,არა პოლიციურ რეჟიმს”. გთავაზობთ მიმართვის ტექსტს:

,,წინა ხელისუფლების დროს დამკვიდრდა პოლიციური რეჟიმი, რომელიც, როგორც აღმოჩნდა, არსებობას განაგრძობს დღესაც.

აუდიტორია 115 აქციების დაწყების პირველივე დღიდან პრინციპულად მოითხოვს, რომ ოდეერებმა დატოვონ უნივერსიტეტები. მათი არსებობა საგანმანათლებლო სივრცეში ზღუდავს უნივერსიტეტების ავტონომიურობას.

,,ოდეერების” წინააღმდეგ მებრძოლ აუდიტორია 115-ის აქტივისტებს ძალოვანი უწყების წარმომადგენლები აკითხავენ სახლებში და აშინებენ მათი ოჯახის წევრებს. მსგავსმა ქმედებებმა პერმანენტული ხასიათი მიიღო. ოჯახის წევრებს ემუქრებიან სამსახურიდან გათავისუფლებით ან დაჭერით, თუ მათთან დაკავშირებული კონკრეტული აქტივისტი არ ჩამოშორდება აუდიტორია 115-ს.

ფაქტია, რომ სიტყვისა და გამოხატვის თავისუფლება ჩვენს ქვეყანაში, წინა წლების მსგავსად, კვლავ იზღუდება.

გვინდა ყველას გავახსენოთ, რომ 2012 წელს პოლიციური რეჟიმის წინააღმდეგ გაიმართა მრავალათასიანი სტუდენტური დემონსტრაცია.დღეს კი ვხედავთ, რომ სტუდენტების მაშინდელმა ბრძოლამ შედეგი ვერ გამოიღო. სწორედ ამიტომ, აუდიტორია 115 აგრძელებს პოლიციური სახელმწიფოს წინააღმდეგ კამპანიას. ჩვენ ვერ შევეგუებით ადამიანის ფუნდამენტური უფლებების და თავისუფლებების შელახვას.

თითოეული მოქალაქის ვალია გაერთიანდეს პოლიციური რეჟიმის წინააღმდეგ ბრძოლაში!

მოდი ორშაბათს, 25 აპრილს, 18 საათზე, უნივერსიტეტის პირველი კორპუსის ეზოში, საიდანაც გაიმართება მსვლელობა სახელმწიფო უსაფრთხოების სამსახურთან.( ჩიტაძის ქუჩაზე)”

ნატალია ჯალაღონია