კათოლიკოს-პატრიარქმა, უწმინდესამა და უნეტარესმა ილია მეორემ საქართველოში ვიზიტით მყოფ აიათოლა შაჰრისტანს და მისი დელეგაციას უმასპინძლა.
მართლმადიდებელი ეკლესიის ხელმძღვანელებისა და რელიგიის საკითხთა სახელმწიფო საგენტოს ინიციატივით გამართულ შეხვედრაზე სასულიერო ლიდერებმა აღნიშნეს, რომ მსგავსი ფორმატის ურთიერთობები მუსლიმ და ქრისტიან საზოგადოებას შორის მეგობრობას და ძმობას, ქვეყნებს შორის კი ურთიერთობების გაღრმავებას შეუწყობს ხელს. საუბარი ასევე შეეხო ირან-საქართველოს შორის არსებულ კულტურულ ურთიერთობებსა და მსოფლიოში დღეს მიმდინარე რთულ პროცესებს, მათ შორის ტერორიზმის საფრთხეებს.
რელიგიის საკითხთა სახელმწიფო სააგენტოს თავმჯდომარემ – ზაზა ვაშაყმაძემ მადლობა გადაუხადა კათოლიკოს-პატრიარქს იმ თანამშრომლობისტვის, რომელიც არსებობს საქართველოს საპატრიარქოსა და მუსლიმთა სამმართველოს შორის.
უწმინდესმა ისაუბრა იმ ისტორიულ, თბილ, მეგობრულ ურთიერთობებზე, რომელიც საქართველოს, ქართულ ეკლესიას წლებია ირანის სასულიერო ლიდერებსა და ზოგადად ქვეყანასთან აკავშირებს. ილია მეორემ ხაზი გაუსვა მსოფლიოში მშვიდობის დასამკვიდრებლად რელიგიის განსაკუთრებულ როლსა და იმ ღირებულებებზე, რომელიც უნდა აერთიანებდეს სხვადასხვა მრწამსის ადამიანებს.
ილია მეორე – “მოხარული ვარ რომ აიათოლა კიდევ ერთხელ ჩამობრძანდა ჩვენ ქვეყანაში. საქართველოს და ირანს განსაკუთრებული სიახლოვე აქვს ერთმანეთთან, არსებობს ისტორიული კავშირები. ჩვენ დიდ პატივს ვცემთ თქვენს კულტურას. დღეს თქვენი ვიზიტი, მნიშვნელოვანია, ვიცით, რომ ქალაქ მარნეულში სამედიცინო დაწესებულება გახსენით. ეს იქნება ხიდი ჩვენს შორის და ამავე დროს, ადგილობრივი მოსახლეობისთვისაა მნიშვნელოვანი. ძალიან რთულ დროში ვცხოვრობთ, მაშინ როცა მსოფლიოში გლობალიზაციის პოროცესები მიმდინარეობს მნიშვნელოვანია შევინარჩუნოთ ჩვენი კულტურა, ენა, ლიტერატურა…. ქრისტიანები და მუსლიმები უნდა გავერთიანდეთ ტერორიზმის წინააღმდეგ. სამწუხარო ის არის, რომ ხშირად ტერორისტები მუსულმანური სარწმუნოების სახელით მოქმედებენ. ტერორიზმს არ აქვს კავშირი რელიგიასთან, ეს სულ სხვა მოვლენაა. იმედი გვაქვს გაერთიანებული ძალებით დავძლევთ მას.”
აიათოლა შაჰრისტანმა მადლობა გადაუხადა პატრიარქს თბილი მიღებისთვისა და იმ მხარდაჭერისათვის, რომელიც მან ბელგიაში მომხდარი ტერორისტული აქტის შეფასებისას გამოთქვა. აგრეთვე, იმისათვის, რომ მეგობრობს და თანამშრომლობს საქართველოს მუსლიმებთან. აღნიშნა, რომ ტერორიზმს რელიგია არ აქვს. ის ანგრევს ურთიერთობებს, უდიდესი ზიანისა და ტკივილის მომტანია ყველასთვის, განურჩევლად რელიგიისა.
აიათოლა შაჰრისტანი-“მიმაჩნია, რომ მსგავს შეხვედრებს კარგი და პოზიტიური შედეგი ექნება. ჩემს ქვეყანაში ძალიან ბევრი კათოლიკოს პატრიარქთან შეხვედრით არის დაინტერესებული. მადლიერები ვართ თქვენი კეთილგანწყობით და იმედი გვაქვს მომავალშიც გავაგრძელებთ მსოფლიოში მშვიდობის დამყარებსითვის მოღვაწეობას. ტერორიზმი არ ინდობს არცერთ რელიგიას და ის ყველას გვემუქრება, ამიტომ უნდა გავერთიანდეთ და ერთიანი ძლით დავამარცხოთ ეს ბოროტება.”
შეხვედრას საპატრიარქოში ასევე ესწრებოდნენ სრულიად საქართველოს შეიხი ჰაჯი რამინ იგიდოვი, რელიგიის სააგენტოს ხელმძღვანელი ზაზა ვაშაყმაძე, ირანის ისლამური რესპუბლიკის სრულუფლებიანი და საგანგებო ელჩი აბბას თალებიფერი.
შეხვედრის დასასრულს აიათოლა ალი სისტანის წარმომადგენელმა აიათოლა სეიდ ჯავად შაჰრისტანიმ სრულიად საქართველოს პატრიარქს ილია II-ს საჩუქრები გადასცა.
სოფიკო ნინიკაშვილი