სოფლის მეურნეობის სამინისტროს სსიპ სურსათის ეროვნულ სააგენტოში გაიმართა შეხვედრა აგრარული უნივერსიტეტის სტუდენტებთან, რომლებიც სტაჟირებას ცხოველთა სასაკლაოებზე გაივლიან. შეხვედრას სტუდენტებთან ერთად სოფლის მეურნეობის მინისტრის პირველი მოადგილე ნოდარ კერესელიძე, სურსათის ეროვნული სააგენტოს წარმომადგენლები და აგრარული უნივერსიტეტის პროფესორ-მასწავლებლები დაესწრნენ.
ნოდარ კერესელიძემ მომავალ ვეტერინარებს აგრარული სექტორის განვითარების სახელმწიფო ხედვა გააცნო და ყურადღება გაამახვილა სურსათის უვნებლობის, ევროკავშირთან დაახლოების და თანამედროვე სტანდარტების დანერგვის მნიშვნელობასა და და ამ პროცესებში ახალგაზრდა კადრების ჩართვის აუცილებლობაზე.
სურსათის ეროვნული სააგენტოს უფროსის ზურაბ ჩეკურაშვილის განცხადებით, სოფლის მეურნეობის სამინისტრო და სურსათის ეროვნული სააგენტო აქტიურად თანამშრომლობენ საქართველოს აგრარულ უნივერსიტეტთან, იმართება შეხვედრები, რაც ხელს უწყობს ახალგაზრდა კადრების პროფესიული უნარების ამაღლებას და აგრარული სპეციალობების პოპულარიზაციას. უახლოეს პერიოდში დაგეგმილია ანალოგიური შეხვედრები სურსათის უვნებლობისა და ფიტოსანიტარიის სპეციალობების სტუდენტებთან, რაც, საბოლოო ჯამში, დადებითად აისახება როგორც სამომხმარებლო, ისე დასაქმების ბაზარზე.
სურსათის ეროვნული სააგენტოს ორგანიზებით, აგრარული უნივერსიტეტის ვეტერინარიის ფაკულტეტის დამამთავრებელი კურსის სტუდენტები სტაჟირებას საქართველოს რეგიონებში არსებულ სასაკლაოებში გაივლიან.
