„დღეს საქართველოში ჰაერი არ არის იდეალური და ამას არც არავინ ამბობს. ჩვენი პრობლემა ჰაერის დამაბინძურებლებთან მიმართებაში არის მტვერი. ქალაქ ბათუმში, თბილისში,ქუთაისში,თბილისში გვხვდება ზღვრულად დასაშვებ ნორმაზე ს ოთხჯერ გადაჭარბება“. ჰაერის დაბინძურებით საქართველში ყოველი 100 ათასი ადამიანიდან, 290 იღუპება. საერთაშორისო ორგანიზაციის კვლევის შედეგებზე და ჰაერის დაბინძურების მხრივ არსებულ პრობლემებზე გარემო ეროვნული სააგენტოს უფროსმა თამარ ბაგრატიამ ტელეკომპანია „GDS“-ზე, გადაცემა „2030“-ის ეთერში ისაუბრა.
„ეს ანგარიში არ ეხება მხოლოდ ატმოსფერულ ჰაერს, აქ ასევე შენობა-ნაგებობების შიდა ჰაერი იგულისხმება. მას შემდეგ, რაც დეტალურად გავეცანით კვლევის ჩატარების მეთოდოლოგიას, საქართველოს საკმაოდ მაღალი პროცენტული წილი აქვს მყარი საწვავის გამოყენების მხრივ. შეშას მოსახლეობის დიდი ნაწილი იყენებს და შიდა ნაგებობების ჰაერის მდგომარეობას ეს ფაქტორი განაპირობებს. ბუნებრივ აირზე გადასვლა შესაძლოა იყოს ინდიკატორი, რომელიც შეამცირებს შენობების შიდა დაბინძურების მაჩვენებელს.
საქართველო მოექცა რეიტინგის პირველ ადგილზე. ეს ინფორმაცია 2012 წლის მონაცემებს ეყრდნობა. მაშინ სახელმწიფო უწყებებს და მათ შორის გარემოს ეროვნულ სააგენტოს მხოლოდ ხუთი სტაციონარული დაკვირვების წერტილი ჰქონდა. 2015-2016 წლებში ჰაერის მონიტორინგის სისტემაში ახალი მეთოდოლოგია შევიტანეთ. 200-ზე მეტი წერტილიდან ვიღებთ ინფორმაციას. ვაკეთებთ მონიტორინგს ახალი სადგურებით, თბილისში სექტემბრიდან 3 იაპონური სადგური გვექნება. 24 საათის განმავლობაში ვაკვირდებით ჰაერის დაბინძურების ფაქტორებს. ახალი ავტომატური სადგომი გვაქვს ასევე ბათუმში.
ქუთაისში მკვეთრად გაუმჯობესდა მდგომარეობა, რაც შეიძლება უკავშირდებოდეს შემოვლითი მაგისტრალის გახსნას. ქალაქს ჩამოშორდა დიდი სატრანსპორტო ნაკადი. გადაჭარბება გვაქვს, მაგრამ არ არის საგანგაშო. თბილისის ვაშლისჯვრის ავტომატურმა სადგურმა 2015 წელს ზღვარზე მხოლოდ მცირედი გადაჭარბება დააფიქსირა ყველა ფაქტორის გათვალისწინებით. თბილისი არ არის ინდუსტრიული წარმოების ცენტრი,რომ სხვადასხვა ტიპის დაბინძურებებზე ვისაუბროთ. დღეს თბილისისთვის ჰაერის მთავარი დამაბინძურებელი არის ტექნიკურად გაუმართავი ტრანსპორტი, მნიშვნელოვანია საწვავის ხარისხიც. საწვავს უკავშირდება ტყვიის შემცველობა, ამ მხრივ კარგი მდგომარეობა გვაქვს. ტყვიის შემცველობა ჰაერში ზღვრულად დასაშვებ ნორმაზე გაცილებით ნაკლებია,“ – განაცხადა თამარ ბაგრატიამ.
მანანა ღოღობერიძე
