„მას შემდეგ, რაც პაპუაშვილს უფლებამოსილების ვადა გაუვიდა, 3 დღეში უნდოდათ საკონსტიტუციო სასამართლოს პლენუმის შეკრება. ვარაუდები მაშინაც გამოვთქვით და დღეს უკვე დადასტურდა, რომ გარკვეული ჯგუფი ჩამოყალიბდა საკონსტიტუციო სასამართლოში, რომელსაც აქვს გავლენა და ეს გავლენა მომდინარეობს ხელისუფლებისგან“. ამის შესახებ კონსტიტუციონალისტმა კოტე ჩოკორაიამ „რუსთავი 2“–ზე, გადაცემა „კურიერის“ ეთერში ისაუბრა.
„ეს მოსამართლეების კენჭისყრამაც დაადასტურა, ხმები ხუთი სამზე არის გაყოფილი და სავარაუდოდ ესენი იქნებიან მაია კოპალეიშვილი, გიორგი კვერენჩხილაძე და ირინა იმერლიშვილი. გამოდის,რომ ამ მოსამართლის გარდა დანარჩენებმა ხმა მისცეს ზაზა თავაძეს.
თუ პროცესს რამდენიმე თვიანი პერიოდით შევხედავთ, მზადება არ დაწყებულა 2 დღის წინ, მზადება დღევანდელი დღისთვის დაიწყო მაშინ, როდესაც საკონსტიტუციო სასამართლოს შესახებ საქართველოს კანონმდებლობაში შევიდა შესაბამისი ცვლილებები. მათ შორის საკონსტიტუციო სასამართლოს თავმჯდომარის არჩევასთან დაკავშირებით. ამის შემდგომ ჩვენ გვქონდა გახმაურებულ საქმეებთან დაკავშირებით გაჭიანურებული პროცესი. გვქონდა პროცესი,როდესაც საკონსტიტუციო სასამართლოს მოსამართლეები არ დადიოდნენ სხდომებზე ჯერ კიდევ და მაშინ გამოითქვა ეჭვები იმასთან დაკავშირებით, რომ მათ შორის მოსამართლე თავაძე ემზადებოდა საკონსტიტუციო სასამართლოს თავმჯდომარეობისთვის და ხელისუფლების ერთგვარი გავლენა ამაში გამოიხატა.
საკონსტიტუციო სასამართლოს დიდი მნიშვნელობა აქვს თავისი შინაარსიდან გამომდინარე. ეს ინსტიტუტი კიდევ უფრო აქტუალური ხდება, როდესაც ჩვენ გვაქვს პარლამენტში საკონსტიტუციო უმრავლესობის შესაძლებლობა და სანამ ეს საარჩევნო სისტემა იარსებებს, მანამ ყოველთვის იქნება ამის საფრთხე. ერთადერთი და მთავარი ქმედითი ინსტიტუცია,რომელსაც შეუძლია შეაფერხოს და დააბალანსოს, გააჩეროს ხელისუფლება, არის საკონსტიტუციო სასამართლო“.
კოტე ჩოკორაიამ გადაცემაში ერთპარტიული საკონსტიტუციო უმრავლესობის საფრთხეზეც ისაუბრა.
„საკონსტიტუციო უმრავლესობის საფრთხე კიდევ ერთხელ დადასტურდა, ჯერ არ არის არჩევნების საბოლოო შედეგები ცნობილი, მეორე ტურები წინ არის და უკვე დაიწყო საუბარი საკონსტიტუციო რეფორმაზე. ტრაგედია არ არის თუ ვინ დააკომპლექტებს საკონსტიტუციო კომისიას. მთავარია ამ კომისიამ რეალურად არ მიიღოს ის გადაწყვეტიელბა, რაც უმრაველსობას სურს. დაველოდოთ როგორი იქნება ამ კომისიის შემადგენლობა. კარგი იქნება თუ სხვადასხვა სფეროს წარმომადგენლები კონსტიტუციას მივიღებთ კონსესუსით“.
მანანა ღოღობერიძე